Basketball-ah Mizoram an te ber lo

71st Senior National Basketball Championship-ah Mizoramin an match hmasa pahnihah Uttarakhand (74-46) leh Tamil Nadu (90-50) te hneh lo mah se Thawhṭanni zan khan group match hnuhnung berah Delhi 57-54 in an hneh.

Mizoram hian champion beisei tawh lo mah se ranking 9-18 an la khel dawn a, Delhi an hneh avangin dinhmun ṭha zawkah an awm theih phah ang. Mizoram hian nizan khan West Bengal an hmachhawn a, zanin dar 7:30-ah Madhya Pradesh nen an inkhel leh ang.

Inelna kalphung
Basketball Championship hi kuminah zone hmangin inelna neih hmasak a ni a, zone pangaah ṭhen niin Services leh Indian Railways-in final round an lut nghal.

NorthEast aṭangin team khat chauh a tel theih a, Mizoram hi Assam hnehtu leh hmarchhak champion an ni. North Zone aṭangin Punjab, Haryana leh Delhi te an tling a, South Zone aṭangin inelna thlengtu Tamil Nadu bakah Karnataka, Kerala leh Telangana te an tling.

West Zone aṭangin Madhya Pradesh, Gujarat leh Rajasthan bakah East Zone aṭangin Uttar Pradesh, Uttarakhand leh West Bengal te an tling bawk.

Team 16 hi group paliah pali zela ṭhen a ni a, group tin aṭanga tiṭha pahnihten champion bakah ranking pariatna thleng an zawng ang.

Mizoram dinhmun chu
Mizoram tan champion theih a ni tawh lo a, an thlen theih sang ber chu pakuana nih a ni. Mizoram hi Delhi bakah West Bengal leh Madhya Pradesh te nen group khatah an awm a, Delhi hi an hneh tawh avangin an hmachhawn nawn a ngai tawh lo.

Ranking pakuana aṭanga 16-na hi team pariatin an zawng dawn a, group hnihah pali ve ve thoin an inṭhen. Heta ṭang hian team zawng zawngin knockout an lut leh vek dawn a, group 1-a pakhatna leh group 2-a palina an inkhel ang a, chutiang zelin an intum chho ang.

Ranking inelnaa tiṭha ber hi pakuanaah an awm ang a, finalist chak lo zawk hi 10-na a ni dawn. Chutiang bawkin semifinal-a chak lo team pahnihten 11-na leh 12-na an zawng ang. Quarterfinal-a tla nghal ten 13-na aṭanga 16-na an zawng bawk dawn a ni.

Hmasawnna
Mizorama player ṭha thlan khawma MBBA-in Mizoram team a tirh hnuhnun ber chu kum 2007 daih tawh kha a ni a, Mizoramin hneh an nei lo.

Mizoram Super League awm hnuah MSL champion Khatla TBL, Mission Veng Vikings leh Zarkawt BCA ten Mizoram hmingin inelna an hmachhawn tawh thung.

MSL club zinga Mizoram hminga kal hmasa ber Khatla TBL-in chak an nei lo a, Mission Veng Vikings erawhin kum 2018 khan Arunachal Pradesh (56-28) leh Tripura (51-16) te an hneh a, Mizoram hminga senior level-a chak hmasa ber a ni. Vikings hian Jharkhand (53-38) leh Chandigarh (63-26) te an hneh loh avangin group stage an paltlang lo a, MSL khelh a ṭul avangin ranking tournament an khel lo bawk.

January 2019 khan Zarkawt BCA-in Mizoram hmingin Goa leh Tripura an hneh a, NorthEast team ni lo hneh hmasa ber an ni. Amaherawhchu BCA hian Delhi an hneh lo a, group match an paltlang lo. Loser knockout-ah Mizoram hian Maharashtra an hneh lo.

Tun ṭum inelna erawh zone hmangin team nem zual thlitfim tawh an ni a, team ṭha chauh an tel tawh avangin chak a harsa lehzual. Mizoram hneh chhun Delhi hi kum 2019-a Mizoram hneh loh an ni a, heta ṭang pawh hian hmasawnna a awm tih a hriat theih.

Inzir belh a ṭul
Mizoram coach K.C. Lallian-tluanga chuan, "Kum 2007 hnuah Mizo player ṭha thlang khawmin Mizoram hmingin kan khel leh chauh a ni a, inzir belh tur kan ngah hle. Tun hnaiah MSL champion-te Mizoram hmingin kal mah se Mizo player ṭha thlan khawm chu a danglam a, tun aia player-te an inhriat chian theih nan Mizoram hminga feh chhuah tam pawh a ṭul a ni," tiin Vanglaini a hrilh.

Group stage-a Mizoram khelh dan sawi zuiin KC-a chuan, "Zan dar 1:00 velah Chennai kan thleng a, a tuk tlaiah Uttarakhand nen kan khel nghal. Kan insiamrem hman lo a ni ber. Outdoor-ah kan khel a, indoor ball kan hmang a, light a eng tha tawk lo nen kan theihna ang takin kan khel lo. Tamil Nadu bik kha chu kawng engkimah kan thlau a, anni kha tum hmasa zawkin Uttarkhand kha hmachhawn hnuhnung zawk ila chuan result a danglam theih hial ka ring," tiin an fixtures fuh tawk loh thu a sawi.