Europa League Xavi enkawl Barcelona inlan hun
Barcelona leh Champions League an inhmeh a, mahse season tir lama an chet chhiat em avangin European football inelna sang ber hi an khel chhunzawm thei lo hial - Europa League lamah hun an hman a ngai a, an inhmeh mai a ngai rih.
Xavi kaihhruaina hnuaia harh thar Barca hian zanin dar 12:30 hian Eintracht Frankfurt an lenchilh dawn. Premier League club West Ham United pawhin quarterfinal inkhel dangah Lyon an mikhual ve bawk ang.
Barca thar
Ronald Koeman-a'n Barcelona din thar leh a tum a, a hlawhtling lo. Captain Lionel Messi a chhuah bawk avangin Catalan club an tlahniam hman viau, an khelmual Nou Camp meuh pawh mikhual tan hmun ralṭi a ni thei lo.
Dutch manager an ban a, a hmunruak hnawh khat turin Xavi an lalut. Player a nih laia Barca midfield lailum luahtu hian tum mumal tak a nei a, thlasik bazarah a player mamawh tak tak a lalut, a chhawr ṭangkai nghal bawk.
Xavi awm hnuah Barca hi team danglam daih an ni tawh. La Liga-ah pawh table laihawl kuahtu kha tunah chuan pahnihna an ni thei tawh a, hmasawnna a zuanin a zuang a ni ber - an hmelma Real Madrid meuh pawh an sawp thei.
Pierre-Emerick Aubameyang leh Ferran Torres te a hmangthiam nghal hi a mak lo. Hliam vanga buai reng leh harsatna neuh neuh nei reng Ousmane Dembele a tuaihriam leh thei te hi Xavi hnathawh mak a ni, zaninah anni pathum hi Frankfurt tana ven ngai tur an ni dawn.
Player 21 an zin
German rama zin turin player 21 chhawpchhuah an ni a, malpui hliam vangin Memphis Depay chu zin zingah a tel ve lo. Sergino Dest leh Sergi Roberto te an inhliam a, tawnhriat ngah Dani Alves chu Europa League squad-ah ziah luh a ni ve lo.
Anni pathum an awm loh takah chuan right back pangngai an hruai lo. Tlarhnung laia khel ṭhin Ronald Araujo chu a sir lamah a tawlh thlak a rinawm. Uruguay international hi Real Madrid lakah khan mual sir lamah hlawhtling takin a khel thei.
Hripui laka fihlim hlim Frenkie de Jong a inpeih leh tawh. Dutch midfielder hi Sevilla lakah Sergio Busquets leh Pedri te nen an inkawp leh thei tawh - Bundesliga club tan anni pathum hmachhawn hi thil châkawm a ni lo ang.
Frankfurt hi Bundesliga table laihawl luahtu an ni a, season an hman ṭhat loh avangin an khelmuala inkhel tur ni mah se goal chhuah tlem an tum a ngai ang. European football-ah hian away goal rule hman a ni tawh lo.
Hammers an inpeih
David Moyes-a'n beissei phak baka ṭhain West Ham chu season a hmanpui mek. Quarterfinal lut tur hian Croatia, Belgium, Austria leh Spainsh club an hneh, tunah chuan French club Lyon paltlang leh an tum dawn.
Mipui 60,000 lenna London Stadium-ah fans an pungkhawm hnem leh dawn, an chakna hnar pawimawh a ni leh ang. European football-ah kum 41 hnua a vawi khat nan quarterfinal an lut leh a ni a, fans hi an phur mah mah a nih pawhin an demawm loh, ticket an hralh fai vek.
Moyes-a naute hi an league match hnuhnungah Everton 2-1 in an hneh a, an boruak a nung ṭha viau. Ligue 1 lamah pawh Lyon an che chhe bik lo, an mikhual Angers chu 3-2 in an lo hneh ve bawk; goal khung thiam mah se zaninah chuan tlarhnung fimkhur an ngai ang.
Club pahnih hi tun hmain an la inkhel ngai lo. Lyon hian English club an hmachhawn hnuhnung parukah tlawm an nei lo, vawi li chakin ṭum hnih chu an inhnehtawk. Europe-ah tawnhriat an neih bawk avangin khualmualah chak an tum ngamin a rinawm.
Europa League - Quarterfinal, First Leg
RB Leipzig 10:15 PM Atalanta
Eintracht Frankfurt 12:30 AM Barcelona
West Ham United 12:30 AM Lyon
Sporting Braga 12:30 AM Rangers