CONCACAF player ṭha ber Alphonso

Canadian left back Alphonso Davies chu CONCACAF 2021 Men's player of the year atan thlan a ni a, North & Central America & Caribbean huam chhungah ani aia footballer ṭha zawk an awm lo.

Kum 21 mi defender hian nikum khan Canada tan match 13 khelin goal nga a khung a, vawi riat assist a nei bawk - match 13 a inlanah hian vawi kua hnehna chanpuiin, vawi li draw an nei a, nikuma an ram team tana a inlanin Canada-in tlawm an nei lo tihna a ni.

Defender ni chunga Canada tan vawi 30 inlana goal 10 khung thei Davies hian World Cup qualifier-ah ram tan match sarih a khel a, mahse, lung lam harsatna neia a buai avangin match ruk a khel lo thung.

Davies hian match ruk ngawt khel lo mah se World Cup 2022 khel tura an tlinna kawngah ram tan a thawhhlawk takzet a, 1986 hnua World Cup an khelh vawi khatna tur a ni.

Kum 2021 chhung khan Bayern Munich tan pawh inelna hrang hrangah match 47 khelin goal khat a khung a, assist vawi riat a nei. Bundesliga nomawi a chawipui bakah FIFA Club World Cup-ah an champion bawk.

Tun season-ah a lung ṭha lo vanga a talbuai avangin Bayern tan match 23 chiah a khel a, assist vawi ruk a nei hman - March thla tawp lam khan club training a zawm leh tawh a, nizana Bayern leh Villarreal inkhelh ṭumah inlan tura beisei a ni.