Koeman-a'n Netherlands a enkawl leh dawn

Ronald Koeman chuan kumin FIFA World Cup zawh aṭangin Netherlands a enkawl dawn. Dutch manager hian World Cup 2026 thleng daih contract a ziak a, kum 2023 aṭangin Oranje hi a enkawl ṭan ang.

Kum 59 mi Koeman hi player a nih laiin Netherlands tan vawi 78 zet a inlan a, Dick Adovcaat-a'n World Cup 2018 a hruai thlen theih loh avangin an ram team enkawl tura lak a ni. Dutch manager hian kum hnih chhung Oranje enkawl mah se Barcelona sawmna hnar zo loin kum 2020 nipui khan Catalan club a pan.

Koeman hi Barcelona-ah a hlawhtling lo a, an khelh dan hmang avangin club ṭantuten an sawisel nasa a, nikum October thla khan president thar Joan Laporta-a'n a ban.

Chutihrualin Koeman hian kum 2000 aṭangin manager hna hi a thawk ṭan tawh a, Ajax, Southampton leh Everton te a enkawl. Netherlands a enkawl hmasak ṭumin Koeman hi a che ṭha a, Louis van Gaal thlak nana an lalut tur pawh hi a mak lo.

Manchester United leh Barcelona manager hlui Van Gaal hian Netherlands hi FIFA World Cup a thlenpui a, group A-ah inelna thlengtu Qatar, Senegal leh Ecuador te nen an awm ho. Van Gaal hi kum 70 mi a ni tawh a, tun hnaiah cancer a neih thu a sawi bawk avangin World Cup zawha chawlh hahdam hi a mamawh a ni.