Leicester tan kawng a inhawng

Premier League club Leicester City-in tun season-ah league kaltlanga European football khelh an beiseina an mangṭha mek a, table-ah 10-naah awmin parukna West Ham chu point 14-in an phak lo.

Premier League-a parukna chinin European football an khel ṭhin a, Hammers hi season thara Europa Conference League khel thei dinhmunah an ding - Foxes tan um phak turin thil mak a thlen a ngai tawh.

Mahse, Brendan Rodgers-a naute hian Europa Conference League hmangin beisei an la nei mek. ECL hmasa berah hian an champion chuan season tharah Europa League an khel dawn.

Foxes-in he thil thlentir tur erawhin hna an nei a, quarterfinal paltlang an la ngai - zanin dar 12:30-ah ECl quarterfinal first leg khel turin PSV Eindhoven an mikhual ang.

Mahse, Foxes tan hna a awlsam dawn lo - hliam vangin Jamie Vardy leh Wilfred Ndidi an la chhawr thei dawn lo a, a bik takin tun season-a Vardy inhliam ngun lutuk hi league lama beisei an phak loh chhanah a puh theih.

Tlarhmaah tun season-a goal sarih khung tawh Kelechi Iheanacho chu rinrawlah neih leh a ṭul dawn tihna a ni a, a thlawp tura Harvey Barnes leh James Maddison te an awm dawn avangin PSV tan a awlsam lo ang.

Chutihrual chuan PSV hi zuam chi an ni bik lo - Dutch league-ah hmahruaitu Ajax chu point li chiahin an phak lo a, champion beiseina an la nei ve reng.

Kum 29 mi Marco Gotze-a'n Dutch club-ah a hming a chher leh tawh a, tun season-a match 45 a khelhah goal 11 khungin assist vawi 10 a nei a, Borussia Dortmund attacking midfielder hlui hi ven bik a sual lo ang.

Israeli forward Eran Zahavi hian match 38-ah goal 16 leh assist 11 a nei tawh a, tun season-a goal 17 leh assist 15 nei tawh Cody Gakpo leh goal kua leh assist vawi nga nei tawh Noni Madueke ten an thlawp dawn - Foxes tan chak tura indahsa a rem lo.

Quarterfinal ngaihven hlawh zingah, coach ṭawng duh ve tak Jose Mourinho-a enkawl AS Roma-in khualmuala Bodo/Glimt an lenchilh tur chu a tel - zanin dar 12:30-ah tho an inkhel ang.

Europa Conference League
Quarterfinal - First Leg
Zanin Inkhel Tur
Feyenoord 10:15 PM Slavia Prague
Bodø / Glimt 12:30 AM AS Roma
Marseille 12:30 AM PAOK
Leicester City 12:30 AM PSV Eindhoven

Quarterfinal - Second Leg
April 14, Ningani Zan
PSV Eindhoven 10:15 PM Leicester City
AS Roma 12:30 AM Bodø / Glimt
Slavia Prague 12:30 AM Feyenoord
PAOK 12:30 AM Marseille