Chelsea ngam loh Karim Benzema

Striker pakhat a awm a, a hming chu Karim Benzema a ni a, Chelsea fan-te thinlunga thai reh tawh ngai loh turin a hming chu ziah kaiin a awm - an hriatchhuah apiangin an thinlung erawh a na ang.

Nilaini zan khan Champions League quarterfinal first leg-ah Real Madrid chuan 3-1 in champion lai Chelsea an hneh a, Spanish club tan Karim Benzema chuan hattrick a siam.

Roman Abramovich hrek avanga Chelsea hliam neihsaah Benzema-a'n chi a al a, Blues fan-ten na ti tak chungin Stamford Bridge an chhuahsan.

Blues tan Kai Havertz chuan goal khat a khung ve a, London club-in beiseina tlem an la nei. Mahse, Santiago Bernabeu-ah second leg khelh a ni dawn a, Chelsea tan semifinal lut turin thil mak a thlen a ngai tawh.

Fak tlak Benzema
Chelsea-in season hmasa an champion dawnin Real Madrid an lo pet chhuak tawh a, Spanish club hian tun hnaiah beisei an phak loh bawk avangin an huphurh hran lo.

Mahse, Real-in Chelsea neih ve loh an nei a, a hming chu Benzema a ni. Kum 34 mi striker hian minute 21-naah goal hmahruai a khung a, Vinícius Júnior siamsak a ni.

Mual sirah thinrim takin Thomas Tuchel a au vel a, mahse, a naute an insiamṭha hman lo - minute thum a liam a, Luka Modric ball duhthusam chu Benzema bawkin mawi zetin a tauh lut.

Minute 25 pawh a tlin hmain Real-in goal hnih an khung fel der a, Chelsea dinhmun a khirh - mahse, beisei tur a la awm tih pholangin Havertz chuan si phurh a rawn sut ṭhen a, 2-1 a ni.

A thlawn mai maw
Chelsea-in chawlhlawk hmain si phurh an sut ṭhen a, player leh fan-ten beiseina an nei. Tuchel pawhin si phurh sut zo turin beisei a la nei tih a substitution siam hmangin a tilang.

German coach hian second half ṭantirah centre back Andreas Christensen leh midfielder N'Golo Kanté a la chhuak a, midfielder Mateo Kovacic leh winger Hakim Ziyech a luhtir.

Mahse, Tuchel-a ruahmannain awmzia a nei hman lo - second half ṭan aṭanga minute khatna lekah Edouard Mendy a chesual a, Senegalese keeper hian a area tlan chhuahsanin defender Antonio Rudiger chu ball a pe.

Mendy-a'n a pet zawi hret a, Rudiger-a'n ball a siamrem hman lo - a bul lawka awm Benzema chuan chak takin ball a la nghal a, hattrick siam nan a hmang.

A hming Benzema
Round of 16 second leg-ah Real-in 3-1 in sum hmang hnem Paris Saint-Germain an lo hneh tawh a, hemi ṭum hian Benzema hian hattrick a lo siam tawh.

Chelsea lakah hattrick a siam leh ta a, knockout match-ah a zawnin hattrick a siam tihna a ni a, Cristiano Ronaldo, Lionel Messi leh Luiz Adriano hnua Champions League-a a zawna hattrick siam leh thei hmasa ber a ni.

Benzema hian tun season inelna hrang hrangah match 36 khelin goal 37 a khung tling ta - Ballon d'Or rim a nam ṭan. Carlo Ancelotti hnuaia a theihna tak tak pholangtu Vinícius hming lam hmaih a rem lo a, a khel ṭha takzet - Benzema goal hmahruai a siamsak hma khan bar a tih per tawh.

Kum 36 mi ni tawh chungin Luka Modric a la rintlak reng a, Croatian midfielder hian game pawh muan a ṭul hunah a pawt muang a, thutlukna dik a siam chat chat bawk - Real tan a la hlu hle.

King Carlo
Real-in Chelsea an lenchilh hmain Ancelotti chanchinin titi a luah a, La Liga nomawi chawi thei dinhmunah ding mek mahse, tun hnaiah El Clasico-a an mualphona chu Real fans tam takin an la na hle.

Mahse, King Carlo hian game boruak sangah a theihna sanzia leh thluak fimzia a pholang leh ta a, last 16 aṭanga Lionel Messi, Neymar leh Kylian Mbappe awmna PSG an petchhuah kha tihpalh a ni lo tih a pholang leh ta.

AC Milan leh Real tana Champions League-a vawi thum lo champion tawh coach hian European football a hre ve tawk a, tunah chuan La Liga mai ni lo, Champions League champion beiseiawm ber pawlah Real a siam leh tawh.

Ancelotti hian Covid-19 a kai avangin a hunah tak Real squad a zawm thei lo a, inkhelh zan khan a fihlim tih hriat niin, Madrid khawpui aṭangin London a pan nghal a, a duh ang tak result nen a haw.

Stamford Bridge a chim?
Chelsea-in an league match hnuhnung berah club tenau Brentford chu 4-1 in an ngam lo a, mahni muala khel an nih avangin Tuchel leh a naute tan chuan mualphona tawpkhawk a ni.

Beiseina sang tak nen Real Madrid an mikhual a, 3-1 in an tlawm - semifinal lut tur chuan football khawvela thawnthu ngaihnawm ber pawl ziah a ngai tawh dawn a, Chelsea tan a harsa tawh dawn.

Premier League-ah pangana Arsenal aia an sanna chu point nga chauh a ni a, Chelsea fans tam takin a chiang tawh saa an ngaih, season thara Champions League khelh pawh, "A chiang," tia sawi ngam a harsa ta.

Pound maktaduai 97.5 man Romelu Lukaku bawk hi Tuchel-a thluak tibuaitu a ni ang - Real lakah goal mamawh avangin bench aṭanga luhtir a ni a, a hun ṭha neiha a ball tauh dan chu a man nen sawizawm tlak a ni lo.

Kan theihna tak tak anga khel chhuak leh tura kan inbuatsaih a ngai a, international break hnuah khan khawi laiah nge kan talbuai ka sawi thiam lo. First half kha chu Brentford laka second half-a kan khelh dan ang a ni ber mai. Kawng tinrengah khan kan theihna angin kan khel chhuak lo a, a mawhphurtu chu keimah pawh tiamin, kan zavaiin kan ni. International break-ah kan nih phung leh kan hriamna kha kan hloh a ni.
Kan tlakna a sang em a, insawifiahna tur ka nei lo. - Thomas Tuchel, Chelsea manager

Benzema hi uain ṭha mi ang mai a ni a, a ṭha tawlh tawlh a ni ber mai. Hruaitu ṭha tak a nihzia a pholang zel a, team tan a pawimawhna hi a zual zel bawk a ni. Second leg hi a la harsa ang tih ka ring a, Chelsea kan mikhual tur kan thlir lehnghal ang. - Carlo Ancelotti, Real Madrid manager

Champions League Quarterfinal
First Leg
April 5, Thawhlehni Zan
Manchester City 1 - 0 Atletico Madrid
MAN: Kevin De Bruyne 70'

Benfica 1 - 3 Liverpool
BEN: Darwin Nunez 49'
LIV: Ibrahima Konate 17'; Sadio Mane 34'; Luis Diaz 87'

April 6, Nilaini Zan
Villarreal 0 - 1 Bayern Munich
BAY: Arnaut Danjuma 8'

Chelsea 1 - 3 Real Madrid
CHE: Kai Havertz 40'
REA: Karim Benzema 21', 24', 46'

Second Leg
April 12, Thawhlehni Zan
Bayern Munich 12:30 AM Villarreal
Real Madrid 12:30 AM Chelsea

April 13, Nilaini Zan
Atletico Madrid 12:30 AM Manchester City
Liverpool 12:30 AM Benfica