Mohammedan an chak zel

Mohammedan SC chuan I League hmahruaitu ni chhunzawm turin Nilaini khan Rajasthan FC chu 2-1 in an hneh. Kolkata club tan Azharuddin Mallick leh Nikola Stojanovic ten goal an khung a, Mizo pathum keeper Zothanmawia, defender Lalramchullova leh winger Brandon VL Remdika ten bul an ṭan bawk.

Mohammedan hian match kua khelh aṭangin point 22 an hmu a, pakhatna dinhmun an hauh. Kolkata club hi pakhatnaah awm mah se an elpui Gokulam Kerala-in point 21 an hmu a, an inkarah point khat chauh a awm avangin champion tur a la chiang lo.

Mizo club Aizawl FC erawh match hnuhnung pahnihah point an hmuh loh avangin 10-naah an awm a, match hnih chauh khelh tur an neih tawh avangin Championship Stage khelh a har tawh ang. Chutihrualin I League khel chhunzawm turin Aizawl FC hian Neroca leh Sreenidi Deccan an hmachhawn hunah point hmuh ngei an mamawh thung.