Phoenix Suns an chak lo

Nimin zing NBA regular season inkhelah Phoenix Suns chu Los Angeles Clippers lakah 113-109 in an chak lo a, season kal laiah vawi 17 an tlawm vena chauh a ni a, chak loh nei tlem ber an la ni chhunzawm zel.

Western Conference hmahruaitu Suns hi playoff khel tura tling hmasa ber an ni a, an tlin chian tawh hnuah pawh an inthlahdah chuang lo. Suns dawta chak loh nei tlem chu Memphis Grizzlies niin, ṭum 24 an tlawm tawh thung.

Suns hian Nilaini zing khan Los Angeles Lakers an hneh a, player ropui LeBron James awmna team chu playoff khel phak lo turin an lo siam tawh. LA khawpui behchhana din pakhat zawk Clippers lakah erawh an che fuh chhunzawm thei ta lo.

NBA - Nimin Results
Dallas Mavericks 131 - 113 Detroit Pistons
Brooklyn Nets 110 - 98 New York Knicks
Washington Wizards 103 - 118 Atlanta Hawks
Boston Celtics 117 - 94 Chicago Bulls
Oklahoma City Thunder 101 - 137 Utah Jazz
Phoenix Suns 109 - 113 Los Angeles Clippers