Quarterfinal-ah Sindhu a lut

PV Sindhu chuan Korea Open Super 500 badminton tournament-ah quarterfinal an in vaw kai. Sindhu a chak lai hian second round inkhel dangah Lakshya Sen erawh a khingpui hneh loin a zinkawng a tawp thung.

Nimin inkhelah world number 7 Sindhu-i'n Aya Ohori chu 21-15 21-10 in a hneh. Olympic medal pahnih la tawhtu hian Japanese star hi vawi 12 a hmachhawnna niin, heng inkhelah hian hnehna a chang vek.

Seeded pathumna Sindhu hian a match lehpekah chuan Busanan Ongbamrungphan a hmachhawn dawn. Thailand shuttler hi thla hmasa lawk khan Swiss Open final-ah a hneh, tun ṭumah pawh beiseina a nei sang ang.

Mipa singles inkhelah world championship bronze medallist Sen-a chu world number 24 Shesar Hiren Rhustavito lakah a chak lo, minute 33 chhung lek an inkhelh hnuah Indian tlangval hi 20-22, 9-21 in a tlawm zawkah a ṭang.

Inkhel dangah Kidambi Srikanth erawh a chak. Srikanth hian Israel player Misha Zilberman lakah 21-18 21-6 in hnehna a chang, a match lehpekah chuan tualchhung player Son Wan ho nen an inhmachhawn leh dawn a ni.