Volleyball inelna lian a awm dawn

Mizoram Volleyball Association (MVA) chuan CYMA nena ṭangkawpin, tualchhung volleyball inelna lian Inter Branch YMA Volleyball Tournament 2022 a buatsaih dawn.

Ruahman dan chuan tournament hi June 21 aṭanga khelh ṭan tur a ni dawn a, tel tum tan June 14 thleng entry fee Rs 500 chu Central YMA Office, Tuikhuahtlangah pek theih a ni ang.

Branch khat aṭangin mipa leh hmeichhe team pakhat ve ve tel theih a ni a, team pakhat chauh pawh neih theih a ni ang. Mipa leh hmeichhe team tel kawp tan entry fee hi Rs. 800 a ni thung dawn a ni.

Tournament hi R. Deng-ṭhuama Indoor Stadium, Mualpuiah khelh a ni dawn. June 17 zanah Central YMA Hall, Tuikhuahtlangah a khuhhawnna 'Spike Off' neih a ni ang.

MVA leh CYMA chuan Mizoram chhung leh pawn, hmun hrang hranga branch leh group YMA te chu inelna hmachhawn turin a sawm.