French Open hnua chawl tur Tsonga

Jo-Wilfried Tsonga chuan French Open tawp rualin tennis chawlhsan a tum thu a puang, a vanglaia world number 5 pawh ni tawh Tsonga hian tennis a khelh hun chhungin ATP singles title 18 zet a vaw chhuak hman.

Kum 36 mi Tsonga hian 2004 aṭang khan professional match a khel ṭan, player ṭha zinga mi ni mah se Grand Slam huangah sulhnu ropui tak a nei lo. Major tournament-ah a champion lo a, 2008 Australian Open final lut mah se Novak Djokovic a ngam lo.

Tsonga chuan, "Hmanni deuh khan thutlukna kan siam, chu chu Roland Garros zawh hunah tennis ka chawlhsan ang tih hi a ni. Ka taksa dinhmun ngun takin ka ngaihtuah a, inkhel zui zel loh hi ka tan a ṭha zawk," a ti.

French Open leh Wimbledon semifinal vawi hnih a thleng a, a thiam zual pariat inelna ATP Finals 2011-ah khan pahnihna a ni bawk - nomawi inchuhna inkhelah Roger Federer a ngam lo.

Roger Federer, Rafael Nadal, Novak Djokovic leh Andy Murray te hunlaia rawn chawr chhuak a ni miau a, nomawi lian tham chawi a harsa. Grand Slam chawi lo mah se 1000 Masters title erawh pahnih a vaw chhuak.

Tun season French Open hi May 25 aṭanga khelh tur niin June 5-ah a zo ang, a hnu lamah chuan kum dang ang bawkin grass court season an hman chhunzawm leh dawn a ni.