Man United manager tur Erik ten Hag?

Manchester United chuan season thar aṭanga manager tur an zawng zel a, Ajax manager Erik ten Hag nen inremna an nei hnai niin sawi a awm. Old Trafford lama thuneituten manager nghet tur chungchang puan nan a la hma deuhin sawi mah se Ten Hag hi ni ngei tura ngaih a ni.

Man United hian Ole Gunnar Solskjaer hnuah manager nghet an la nei lo a, tuna club enkawltu Ralf Rangnick hi chu manager lailawk chauh a ni. Old Trafford-a manager hna chelh tur hian Chelsea manager Thomas Tuchel, Spain manager Luis Enrique, PSG manager Mauricio Pochettino leh Ten Hag te hming sawi rik an ni.

London club-ah Tuchel hi a nghet a, Enrique pawhin World Cup-ah Spain enkawl ngei a duh avangin manager ṭha pahnih hi beisei ngam chi an ni lo. Hemi a nih avang hian manager pahnih Ten Hag leh Poch teah an sawr zim.

Man United football director John Murtough, technical director Darren Fletcher leh advisor Ralf Rangnick ten Ten Hag-a khelh dan hmang hi club nen a inmil zawkah an ngai a, contract an ziahpui hnaiah a ngaih theih.

Chutihrualin Ten Hag-a enkawl Ajax hi PSV Eindhoven nen champion nih an inchuh mek a, Man United hian Dutch club chunga zahna lantir nan contract hi an la pawt tlai thei. Dutch club chief executive hi United goalkeeper hlui Edwin van der Sar a ni bawk.

Ten Hag hi Man United manager tura tih ngheh a nih chuan coaching staff-ah Man United coach hlui emaw player hlui emaw a lalut dawn niin an sawi a, Mike Phelan erawhin assistant manager hna achelh chhunzawm a rinawm loh.