An elpui lakah Everton chak lo ; Lampard a naute hmabak a hautak dawn

'Premier League aṭangin Everton an tla lo ang' tia sawi huai a harsa ta. Frank Lampard-a naute hi table mawng lama an elpui Burnley lakah 3-2 in an tlawm a, relegation zone aṭanga an himna chu point khat chauh a ni.

Nilaini zan inkhelah Burnley tan Nathan Collins, Jay Rodriguez leh Maxwel Cornet ten goal khat ṭheuh an khung. Toffees goal hnih hi Richarlison-a'n penalty aṭanga a khung ve ve a ni thung a, point hlawhchhuah nan a tawk zo chuang lo.

Beiseina thamral?
Everton hian kum 68 chhung chu English football inelna sang ber an khel tawh, an awm rei ta vang vang hle. Tunah chuan a kum 69 nan an awm chhunzawm dawn em, tih a chiang ta lo a, manager Lampard lakah mawhphurhna a sang zual.

Rafael Benitez-a'n a enkawl laiin Everton hi an che ṭha tawk lo, an manager hi an ban. January thla khan Lampard an lalut a, danglamna an beisei. Mahse, English manager an neih china league match kua an khelhah vawi hnih chiah hnehna an la chang.

An hneh tura ngaih Burnley lakah pawh an che thei tlat lo. Team pahnih an inhnehtawk mek laiin Richarlison leh Dominic Calvert-Lewin ten hmahruaina goal khung theihna ramchang an nei a, mahse keeper Nick Pope an paltlang thei lo a ni.

Pope a chet ṭhat laiin Jordan Pickford erawh a che fuh lo, a ball pet chhuah fuh lo avangin Burnley lamin 'throw-in' an hmu a, hun tawp dawnah Cornet-a'n chakna goal a khung theih phah, England keeper tan tihsual siamṭhat theih a ni tawh lo.

Hmabak a hautak
Premier League season kal laiah Everton hian khelh hmabak match pakua an la nei a, a awlsam dawn tawh lo. An tiatpui tur nia ngaih lakah an chak thei miau lo a, anmahni aia team ṭha zawk laka point hmuh phei chu a harsa zual ngeiin a rinawm.

Inrinni tlaiah Manchester United an mikhual zui dawn a, chumi hnuah - Leicester City, Liverpool leh Chelsea te a zawnin an hmachhawn dawn. Season tawp hmain Crystal Palace leh Arsenal an tum a la ngai dawn bawk.

Table hnuai lama mi tan point hmuh a harsa a, Everton hnuaia awm - Burnley, Watford leh Norwich te tan pawh point hmuh belh a harsa dawn. Chutihrualin Everton fixture en hian a awlsam dawn lo, inhamtang tur chuan thil mak a thlen a ngai dawn.

Chutihrualin Everton hian thil mak thlentir turin player an nei ṭha. Lampard-a'n forward Richarlison leh Calvert-Lewin te a inkawp remtir thei a nih chuan goal khung turin an ṭha tawk a, a hnunglam venhim dan an zir tel erawh a ngai ang.

Eng nge an sawi?
Everton manager Lampard chuan, "Hnehna kan chang khat hle, kan khingpui Burnley pawh an chak khat. Chumi vanga table hnuai lama awm kan ni, kan dinhmun ṭha lo tak aṭanga tho chhuak turin mawhphurhna kan nei a, thawhrim leh zual a ngai.

"Match khelh hmabak pakua kan la nei a, point hmuh theih chu 29 a ni. Kan tan chuan engkim mai hi chona a ni dawn. Tun ṭuma kan goal chhuahte kha en ila, tihsual leh fimkhur tawk loh vang a ni, kan siamṭha thei ang," a ti a, inhamtan chu an thil tum ber a nih thu a sawi bawk.

Burnley manager Sean Dyche chuan, "Chawlhlawk lai khan 2-1 in kan hnufual. Ka naute hnenah khan kan khelmuala khel kan ni a, fans ten an duh leh kan mamawh ang ngeia chak a ngaih thu ka sawi, player tinin hrilh nawn ngai loin an tih tur an hre bawk.

"Tun ang dinhmun harsaah hian kan lo ding tawh ṭhin, chuvangin engtianga hmachhawn tur nge a nih kan hria. A pawimawh ber chu rilru paukhauh leh beidawng ve ngai lo neih a ni," tiin a sawi a, tla thei dinhmunah la ding mah se him theih a inbeisei.