Lopetegui-a'n Martial a chhan duh lo

Sevilla boss Julen Lopetegui chuan fan-ten an auh el Anthony Martial a chhan duh lo a, Manchester United aṭanga loan-a a hawh forward chu fan-te duh pe turin a ti!

Kum 26 mi Martial hian January khan Sevilla hi season tawp thleng atan loan-in a zawm a, mahse, Spanish club tan match kua a khelh tawhah goal khat chiah a la khung.

La Liga-a an match hnuhnung berah Sevilla hian 1-0 in Barcelona an ngam lo a, inkhelh hmaa pahnihna team hi table-ah palina an ni zui. He inkhelah hian Martial-a'n bul ṭan mah se beisei a phak lo a, fan-ten an au el a ni.

Kum 55 mi Lopetegui chuan, "Kan inkhelhna hi top level a ni a, mipuiin an rilru puthmangte tilang turin zalenna an nei a ni.

"Coach ka nihna angin Martial hi a ṭhat dan ang bera khel tura puih hi ka tih tur a ni. Chutiang a nih rual chuan, professional a nihna angin a tih tur a ti ve tur a ni a, kan beisei min pe let tur a ni," a ti a, French forward tan ngaihthlak a nuam lo ang.

Martial hi September 2015 khan United chuan AS Monaco aṭangin an lei chhuak a, pound maktaduai 36 pe phawtin, a khelh ṭhat dan a zira a man hi pound maktaduai 58 thlenga sang thei tura tih a ni.

Mahse, a hunlaia kum 20 tling lo footballer man to ber hian Old Trafford-ah beisei a phak lo a, a season hman ṭhat leh chhiat a inchhawk a ni ber - tun season-ah Sevilla a pan hma khan United tan match 11 khelin goal khat chiah a khung.

Sevilla hian zanin dar 12:30-ah league match khel turin Granada an mikhual dawn a, Martial hian bul a ṭan a nih chuan en bik a hlawh ang - a hmingchhe mek thai reh turin khelh ṭhat a mamawh.