Vardy a la chawl rei dawn

Leicester City manager Brendan Rodgers chuan a striker Jamie Vardy lo kir hun tur a sawi theih loh thu a sawi a, Foxes boss chuan, "A lo kir hun tur sawi lawk hi thil harsa tak a ni," a ti.

Vardy hi March 5 khan Leeds United lakah a inlan a, mahse, minute 30 chiah khelmualah hun a hmang hman tihin a khup hliam vangin lakchhuah a ni - kuminah hian minute 79 bak a la inkhel lo.

Rodgers chuan, "A khup hi na a la ti tlat. Tlan a harsat tawh lo a, mahse, ball a pet chiah hian na a ti ṭhin a, hei hi a chhan kan hriatchhuah vat a ngai.

"Medical team nen inbiak leh phawt a ngai a, hma taka lo kir thei tur chu niin a lang lo," a ti a, Foxes ṭantute tan an coach thusawi hi hriat a nuam lo ang.

Kum 35 mi striker hian tun season-ah hliam vangin match 24 chiah a la khel a, goal 12 leh assist pahnih erawh a nei hman tho.

Leicester City hian nizan dar 12:30 khan Europa Conference League quarterfinal first leg-ah PSV Eindhoven an mikhual a, result kan hre hman lo.