Pawn lam intihbuai tir ka tum lo - Stones

Manchester City defender John Stones chuan Premier League nomawi chawi an tumna kawngah pawn lam thil intihbuai tir a tum lo a, an inkhel tur chauh ngaihtuah a tum.

Manchester City hian Pathianni zan dar 9:00-ah league match khel turin Liverpool an mikhual dawn a, team pahnih inkarah point khat chauh a awm avangin an inkhel tur hian ngaihven a hlawh hle.

Mi tam tak chuan Pathianni zan inkhela chak zawk hi champion tur ang hialin an sawi a, a awm lo hran lo - mahse, Stones chuan hei hi a pawm ve lo.

Kum 27 mi centre back chuan, "Kan inkhela chak zawk champion tur anga sawi hi ka pawm ve lo - hetiang ngaihtuah nasat hi min tibuai thei thil a ni bawk.

"Table-a pakhatna leh pahnihna inkhel tur kan ni a, mi zawng zawngin an hre vek. Keimahni leh kan khelh dan kan ngaihtuah a pawimawh ber a, khelh dan thlak loh a ngai bawk ang," a ti.

Stones chuan sawi zawmin, "Kan tan kar pawimawh tak a ni a, hetiang ang boruak hi kan lo tem tawh avangin, rilru hahdam takin kan inkhel tur kan thlir a ni," a ti a, chi ai a duh lo.

City hian Liverpool an mikhual zawhah Champions League quarterfinal second leg an khel zui dawn a, khualmualah Atletico Madrid an lenchilh ang.

Pep Guardiola naute hian first leg-ah 1-0 chauha hnehna an chan avangin an dinhmun a la him lo hle - Atletico an hmachhawn zawhah, April 16 zan khian FA Cup semifinal-ah Liverpool nen an inkhel leh dawn bawk.

Stones chuan, "Pawn lama mi thil sawi intihbuai tir kan tum lo, he hmun ka pan hnua kan tih fo ṭhin angin, kan hmaa inchhawpte chiah ngaihtuah chungin kan inbuatsaih a, eng nge kan duh a, enge nih kan tum chiah kan ngaihtuah - chu chu hlawhtling tura kan paltlang ngai chu a ni.

"Hnehna chan kan duh vek a, kan theihna zawng zawngin kan bei bawk ang. Pawn lam ni loin, ka tih tur chiah ka ngaihtuah. Mihring ve tho ka ni a, Liverpool nena kan inkhel turin a ken tel leh a pawimawhna te pawh kan hre vek.

"Match tin hi kan tan chuan final ang a ni a, chutiang chuan kan khel vek ṭhin," a ti a, champion a tum ruh hle.