Mizoram Premier League Season 7 ; Mimal lawmman dawng thei tur a hriat ta

McDowell's No.1 Soda Mizoram Premier League Season 7 mimal lawmman dawng thei tur chu nimin khan MPL Board-in a puang a, champion lai Chhinga Vengin player pasarih thawhin an thawh hnem ber a, Aizawl FC leh Electric Veng FC ten player pali ve ve an thawh bawk.

Mimal lawmmanah hian postion tinah player panga zel thlanchhuah an ni a, player 20 thlan chhuah zingah mimal chawimawina dawng tawh pathum chiah an la awm. Goalkeeper pahnih Lalawmpuia leh Lalmuanawma bakah forward MS Dawngliana te chu chawimawina dawng tawh an ni a, best defender leh best midfielder nominee-ah mi thar vek an awm.

Goalkeeper hi...
MPL club pariat chiah a awm avangin position hrang hrangah goalkeeper nominee-a lan a harsa lo ber tiin a sawi theih a, chutihrualin ṭha ber nih a ngaih avangin position dang ang thoin chawimawina dawn a ngai thung.

Aizawl FC keeper AwP-a'n season ṭantirhah khelhna hmun chang tam lo mah se AFC-in I League an khelh kawp avangin season tawp lamah a lut tam. Best keeper vawi lia thlan tawh AwP-a hian league round-ah match khatin Gurpreet Singh aiin an khel tam a, semifinal pahnihah a inlan bawk avangin I League club keeper pathum aṭanga nominee-a awm tura awm ber a ni.

Mizoram Police keeper F. Lalmuanawma'n best keeper ni nawn turin match a khel tam tawk em tih zawhna a awm a, amaherawhchu man of the match-ah vawi thum ngawt thlan a nih avangin Khawbung tlangval hian chawimawina dawng nawn turin beiseina a nei ang.

Season liam taa Chhinga Veng champion puitu keeper Zothanmawia ṭum dang ang thoin team inngahna a ni a, final an luhna kawngah pawh a thawh hlawk a, keeper ball sem thiam ber zinga mi a ni a. College Veng tlangval hi man of the match-ah vawi hnih thlan a ni.

Best keeper nominee-ah hian Electric Veng keeper Lalrinnunga leh Chanmari FC keeper MS Dawngliana te an lang bawk.

Chhingcows pathum
Best defender nominee pangaah Chhinga Vengin defender pathum Hmingthanmawia, PC Laldinpuia leh Vanlalzuidika te an thawh a, Bethlehem Vengthlang tlangval Hmingtea chu tlarhnung player zinga wing back thlanchhuah awmchhun a ni.

Aizawl FC aṭangin vice captain Lalhriatrenga (Achia) thlanchhuah a ni a, Chanmari tlangval hian I League-ah khelhna hmun chang lo mah se MPL-ah hmun pawimawh changin team innghahna a ni a. Electric Veng FC defender Vanlalremruata chuan season ṭantirhah mi hriat lohin bul a ṭan a, nominee-a tel pha khawpin season a khar.

Tun season match 60 khelhah defender panga chiahin man of the match an dawng pha a, vawi thum dawng thei Chawnpui defender Lalthlamuana bakah vawi khat ve ve dawng Jonathan H. Lalhriatkima (BVT) leh Lalmawizuala (Ramhlun North) te chu an tel lo. Nominee-a tel zingah Dinpuia leh Achia te man of the match-a thlan an ni a, vawi khat ve ve thlan an ni.

Foreigner awmchhun Alfred
Nominee-ah Alfred Kemah Jaryan chiah foreigner lang a awm a, Liberian player hi best midfielder nominee-ah telh a ni. Aizawl FC captain hian I League match hnuhnung lamah defender hna a chelh a, MPL-ah erawh midfielder-ah chhawr niin forward-ah thlan a ni zeuh bawk.

Alfred hian MPL-ah goal li a khung a, semifinal first leg-a Police lama a khung chu a goal khung zinga pawimawh ber a ni. Midfielder nominee-ah pawh Chhinga Vengin thawh hnem berin Lalrinchhana leh Lalromawia te an tel. Romawia hian goal thum a khung a, man of the match-ah vawi hnih a thlan a ni a, Rinchhana erawhin goal leh mimal lawmman dawng lo mah se midfield-ah hmun pawimawh a chang.

Best midfielder nominee zingah Vanlalthanga'n goal a khung hnem ber a, goal ruk zet a khung a, man of the match-ah pawh ṭum thum lai thlan a ni. Hualngohmun tlangval Thanga ang bawka ball pet thiam Electric Veng captain Isak Vanlalpeka hming telh a ni a, Kolasib tlangval pawh hi vawi thum man of the match-a thlan a nih bakah goal li a khung bawk.

Goal khung thiam rual
Best forward nominee-ah goal khung tam ho an in tlar thla a; MS Dawngliana (Chhinga Veng), Lalfakzuala (Mizoram Police), Lalnunzama (Chanmari FC), David Lalchhuanawma (Electric Veng FC) leh F. Lalremsanga (Aizawl FC) te hming a lang.

Forward panga goal khung belh khawm hi goal 33 a ni a, MPL7-a goal lut zat goal 150 aṭanga 22% zet chu best forward nominee khung a ni. Goal riat khungtu Dawngtea leh goal nga khungtu Remsanga te chu man of the match-ah vawi li ve ve thlan an ni a, goal ruk khungtu Zama leh David-a te man of the match-ah vawi hnih ve ve thlan an ni a, Police forward Fakzuala'n goal riat tehmeuh khung mah se man of the match-ah vawi khat chauh thlan a ni thung.

Club Thawh zat
Chhinga Veng 7
Aizawl 4
Electric Veng 4
Chanmari 2
Mizoram 2
Chawnpui 1
Ramhlun North 0
Bethlehem Vengthlang 0
Mimal Lawmman - Nominees
Goalkeeper
Lalawmpuia Aizawl FC
F. Lalmuanawma Mizoram Police
Lalrinnunga Electric Veng FC
MS Dawngliana Chanmari FC
Zothanmawia Chhinga Veng
Defender
Hmingthanmawia Chhinga Veng
Lalhriatenga (Achia) Aizawl FC
PC Laldinpuia Chhinga Veng
Vanlalremruata Electric Veng FC
Vanlalzuidika Chhinga Veng
Midfielder
Alfred Kemah Jaryan Aizawl FC
Isak Vanlalpeka Electric Veng
Lalrinchhana Chhinga Veng
Lalromawia Chhinga Veng
Vanlalthanga Chawnpui FC
Forward
David Lalchhuanawma Electric Veng
F. Lalremsanga Aizawl FC
Lalfakzuala Mizoram Police
Lalnunzama Chanmari FC
MS Dawngliana Chhinga Veng