Spurs tan Barca hneh a ngai

"Lionel Messi hi khawvela ṭha ber a ni a, mahse Barcelona hi mihring ve tho an ni tih kan hria," tiin Tottenham Hotspur midfielder Dele Alli chuan a sawi a, Alli thu sawi aṭang hian Spurs chuan Nou Camp-ah hnehna chan beiseina an nei tih a hriat theih.

Zanin dar 1:30 hian Nou Camp-ah Barcelona chuan Tottenham an mikhual dawn a, Catalan club hi group B hmahruaitu an ni chiang tawh. Spurs erawh pahnihna ni mah se Inter Milan nen an point an inzat, Italian club hian PSV Eindhoven an mikhual thung dawn.

Chak a ngai

Tottenham hian hnehna an chang a nih chuan last 16 an lut mai dawn a, point an hloh zeuh a, an elpui Inter-in point an neih belh thung a nih chuan Mauricio Pochettino naute an tla ang - Spurs leh Inter tan chak loh a thiang lo.

Spurs manager Poch chuan, "Inkhel hautak tak a ni dawn, kan khungpui tur hi an dinhmun chiang tawh mah se awlsam takin min hlahthlem hauh lo ang," a ti. Argentine manager hian kar tawpa Leicester City nen league match an khelh ṭumin Harry Kane chu bench-ah a hahchawlhtir.

Chak an mamawh thu sawi zuiin, "Hnehna chan phu taka kan khelh chhuah ka duh a, European team zinga a ṭha berte zinga mi kan hmachhawn dawn avangin ka naute chuan inkhelah an rilru 200% an pek a ngai hial dawn," tiin a sawi.

Beiseina

Barcelona hi an group-ah pakhatna an ni chiang tawh a, Spanish La Liga lamah hmahruaitu an ni mek bawk. An dinhmun a chian tawh avangin captain Lionel Messi bakah player ṭha ṭhenkhat an chawlhtir a nih pawhin a mak lo ang.

Kum 31 mi Messi chungchang sawiin Alli chuan, "Ka hmuh dan chuan khawvela ṭha ber a ni a, a inkhel lai en pawh hi a nuam. Chutih rualin a inlan a nih pawhin kan buai phah tur a ni lo," a ti. English midfielder hian Nou Camp chu a naupan lai aṭanga inkhelh a châkna hmun a nih thu a sawi bawk.

Tottenham hian Wembley Stadium-ah Barcelona hi 4-2 in an ngam lo tawh a, an tan thawhchhuah hi a awlsam dawn lo. Chutih rualin Kane, Eriksen, Dele Alli leh Son Heung-min te an khelh fuh ni a nih hlauh chuan team ṭha tak pawh hneh thei tur an ni.

Barca lam thu

Barcelona coach Ernesto Valverde chuan player chawlhtir tur chungchang a sawi lawk duh lo a, chak an tum thu erawh a sawi lang thung. Valverde chuan, "Champions League inelna hi kan zah a, a bik takin keimahni khelmuala inkhel tur kan nih avangin chak kan tum dawn," tiin a sawi.

Spanish club lian hi khawvela team ṭha ber ang hial a sawi ni reng mah se, tun hnai hian UCL-ah an hlawhtling tawk lo. 2015 hnuah an la champion leh lo a, he tih lai hian an elpui Real Madrid chu a zawnin vawi thum an champion thung - kuminah champion an tum avangin eng match pawh ni se chak vek an duh ang.