A tawpah River Plate an chungnung

Football inkhel hmuhnawm tam tak a awm a, boruak sang leh ngaihven hlawh bik pawh a awm ṭhin. River Plate leh Boca Juniors ten Copa Libertadores final an khelh hi khawvela inkhel boruak sang leh inbeihna a nasat ber ṭum te zinga mi a ni chiang.

Pathianni khan final second leg chu Real Madrid khelmual Santiago Bernabeu-ah khelh zawh a ni a, first leg-a 2-2 a nih tawh hnuah River Plate hian 3-1 in hnehna an chang a, inkhel pahnih belhkhawmah 5-3 a chakin nomawi an chawi. Buenos Aires club pahnih hi kum 58-a upa South America football inelna sang ber final-a an intum vawi khatna a ni a, River Plate tan pawh tun ṭuma an nomawi lak hi hemi hmaa an lak tawh nomawi pathum aiin a hlu bik ang.

River Plate an chak

First leg hi Boca Juniors khelmuala khelh a ni a, second leg hi River Plate 'home match' a nih avangin Spain khawpuiah Boca ṭantute tan hmun a awm lo. Amaherawhchu Boca Juniors lamin Dario Benedetto hmangin chawlhlawk hma chiahin goal hmahruai an khung a, second half-ah Barcelona striker hlui Lucas Pratto hmangin River Plate lamin an sut.

Hun pangngaiah goal dang a luh tawh loh avangin extra time khelh a ni. Minute 92-naah Boca midfielder Wilmar Barrios chu yellow card vawi hnihna hmuh vangin hnawh chhuah a ni a, player tam zawk an nih hnuah River Plate midfielder Juan Quintero leh Gonzalo Martinez ten goal an khung belh.

South America khawmual-puiah chuan Copa Libertadores hi an dahsan ber a ni a, Europe khawmualpui chu ni se Champions League tlukpui ang a ni. Tun ṭum an inkhel hi entu 72,000 zet awmin player langsar tam takin a hmunah an en - an zingah hian Lionel Messi leh Pablo Dybala te pawh an tel.

Spain lamah

Buenos Aires khawpui club pahnihte hian November 11 khan first leg an khel tawh a, 2-2 in an inhnehtawk. An intawn hmasak ṭum pawh hi ruah sur nasa vangin a hun vawi khat sawn a ni. River Plate khelmualah hian November 24 khan inkhel tur an ni a, mahse Boca player chuanna Bus beih a nih avangin a hun sawn a ni a, a hnuah buaina tenau chhuak avangin a hun sawn nawn leh a ni bawk.

Bus beih a nih avang hian Manchester City, Manchester United leh Juventus tana khel tawh striker Carlos Tevez chu hliam tuar zingah a tel. Argentina khawpuiah second leg an khelh mai theih loh avang hian mel 6,000 zeta hlaah an inkhelhna tur hmun hi sawn a ngaih phah.

Boca Juniors lam hian buaina chhuak avangin, infiamna lama thubuai ngaihtuahtu sang ber Court of Arbitration for Sport (CAS) hnenah River Plate chu inelna aṭanga paih (disqualified) turin an ngen a, mahse an ngenna hi hnawl a ni.

Ti chuan...

Argentina khawpui ngeia Copa Libertadores final khelh zawh duhtu an tam a, an zingah hian Tevez pawh a tel. Argentine striker chuan, "Ram chhung ngeia inkhelh dan tura kan duhthusam tawh sa chu an tham raltir a ni," tiin a sawi.

Ngaihdan a inang fo thei lo, an ṭhat dan tur bera an ruahmanna siam danah South American football head Alejandro Dominguez erawhin ngaihdan nghet tak a nei a.

Dominguez chuan, "Madrid hi kan tan chuan hmuh duhthusam a ni. Spain-ah hian Argentine mi 350,000 chuang zet an awm tih kan hria, he khawpuia chengte tana hun ṭha bik kan siamsak thei hi a ṭha hleah ka ngai. Heng bakah hian Bernabeu Stadium-a football ropui khelh hi chu a hlu takzet a ni," tiin a sawi.