Liverpool tan Champions League 'final'
May 27 khan Liverpool-in Champions League final-ah Real Madrid an hmachhawn a, Europe-a vawi ruk champion an tumna kawngah Spanish club an ngam lo.
Season a thar a, Liverpool-in Champions League final an khel leh dawn ta - tuna an final khelh tur erawh 'official final' a ni lo a, May thlaa an dinhmun nen chuan inthlau tak a ni.
Zanin dar 1:30-ah Liverpool hian Napoli chu group stage-a an match hnuhnung berah an hmachhawn dawn a, season hmasa finalist hi last 16 lut lo thei dinhmunah an ding mek.
Jurgen Klopp leh a naute hian group stage-a mualpho taka tlak an duh loh chuan 1-0 emaw Napoli aia goal hniha tam zawk an khung ngei a ngai dawn - 'final' tih sak loh rual a ni lo.
Liverpool thar?
Merseyside club-in Champions League lamah dinhmun derthawng tak hmachhawn mah se Premier League-ah erawh ngam loh val an la tawng lo a, match 16 an khelh tawhah an la tlawm miah lo.
Premier League-a an match hnuhnung pahnihah goal sarih ngawt an khung a, an lamah goal khat chiah a lut - he team hian goal khung turin theihna an nei tih a chiang a, tlarhnung ven lamah buaina an nei tlem tih a lang bawk.
Serie A lamah Napoli an duai bik lo. Table-ah Juventus chiah an phak lo a, an league match hnuhnung pahnihah goal ruk an khung a, goal khat chiah an chhuah - match hnuhnung pahnih aṭanga thlir chuan Liverpool nen an dinhmun a inang hle.
Napoli hian goal khung an harsat bik lo tih a lang a, goal khung mamawh Liverpool dang chat turin an tlarhnung hi ngaihtuahawm an ni lo tih a lang tel bawk.
Hei le Salah
Season ṭan tirah Mohamed Salah-a'n sawisel a hlawh a, mahse a thiam ngaiin Salah a lo la thiam reng tih tun hnaiah hmuh turin a awm a, a match hnuhnung berah Bournemouth lakah hattrick a siam.
Premier League match 16-ah goal 10 a khung tling leh der tawh a, season hmasa Champions League-a goal 10 khungtu hian European club inelna sang berah erawh goal hnih chiah a la khung thung.
Salah chauh dem theih a ni bik lo. Season hmasa Champions League-a goal 10 khungtu Sadio Mane chuan goal khat chiah a la khung a, goal 11 khungtu Roberto Firmino-a'n goal hnih chiah a la khung bawk.
Heta ṭang ringawt pawh hian Liverpool-in season hmasa an phak loh chhan hi tlarhma pathum ten Champions League-a beisei an phak loh vang tih chiang takin a lang a, Napoli hneh tur chuan anni pathum hi an chet ṭhat a ṭul ang - Liverpool tan Bournemouth hmachhawn thei lo Saido Mane a inlan theih dawn leh dawn loh he thu buatsaih a nih lai hian a la chiang lo.
Hello Red Star
Liverpool-in tlang turin 1-0 a chak emaw goal hnih aia tam chak an mamawh tih kan sawi tawh a, mahse zaninah hian Serbian club Red Star Belgrade-in puih theih dan an nei.
Serbian club hian zanin dar 1:30-ah vek Paris Saint-Germain an mikhual dawn. Red Star hian PSG hi an inhnehtawkpui a nih chuan Liverpool hian 2-1 in hnehna chang pawh ni se an tlang ang.
PSG leh Red Star an inhnehtawk a, Liverpool hian 2-1 a Napoli an hneh a nih chuan club pathumin point kua ṭheuh an nei ang a, an pathum intum tawhnaa point hmu hnem ber Liverpool (6) hi an tlang daih dawn a ni.
He thil hi thleng thei loah ngai suh - Red Star hian Napoli an inhnehtawkpui tawh a, Liverpool an hneh tawh bawk - mahni mualah chuan he team hi team 'dang' daih an ni tih hriat a ṭha. Chutih rualin an khingpui tur hi French Ligue 1 roreltu an nih avangin a awmsam bik lo ang.