Australia khelmualah India chak

India chuan kum 2008 hnua a vawi khat nan test match-ah Australia chu an ramah ngeiah an hneh a, nimin khan run 31-in an hneh - test series match hmasa bera Australia-a hnehna an chan vawi khatna a ni bawk.

Team pahnih hian December 5 khan test hi an khel ṭan a, India tan Cheteshwar Pujara chu batsman che ṭha ber a ni. 1st innings-ah run 123 a siam a, 2nd innings-ah run 71 siam bawkin India tan a thawhhlawk fal hle.

Indian bowler zingah Ravichandran Ashwin leh Jasprit Bumrah an che ṭha bawk a, wicket ruk ve ve an la - Australian player zingah che ṭha tia sawi tur an awm lo.

Cricket format hrang hrang khel tura Australia-a thang mek India hian Twenty20 series khel zo tawhin mualneitu nen hian an inhnehtawk a, test series-ah hian match li khelin ODI series-ah match thum an khel bawk ang.

India captain Virat Kohli chuan, "Australia-ah hian test series-ah hma kan la hruai ngai miah loh avangin a nuam em em a ni. Kan fast bowler te kha an rawn che ṭha em em a, Australia khan awlsam taka tlawm an tum dawn lo tih kan hre sa a ni," tiin hnehna chang tura theihtawp an chhuah thu a sawi.

Men in Blue leh Australia te hian December 14-ah test series kal meka match hnihna chu an khel leh ang.