Goa-ah Aizawl FC an chak lo

Aizawl FC-in Pathianni zan khan Churchill Brothers chu 4-1 in an hneh lo a, I League khelh mekah Mizo club hi pakhuanaah awmin khualmualah chak hmel an hmu lo a, Goan club erawhin tun season-ah chak loh an la nei lo thung.

Tilak Maidan-a inkhelah Churchill Brothers tan Khalid Aucho (23'), Israil Gurung (24'), Anthony Wolfe (62') leh Willis Plaza (78') ten goal khat ṭheuh an khung a, AFC tana goal awmchhun hi Ansumana Kromah-a'n minute 55-naa a khung a ni.

I League-ah Gift Raikhan-a'n tlarhnung phuahchawp hmangin Alfred Kemah Jaryan chu tlarhnungah a pawt let a, team captain hi hliam zai hnua ngai la awh lo Kareem Omolaja Nurain nen an inkawp. Mual sira awm Vanlalduatsanga pawh tun hmaa forward ṭhin a ni a, Lalramhmunmawia tan erawh left back chu a thiamna ber a ni.

Mizo club tana Kromah-a'n goal a khung chiah hian 2-1 a ni a, point hlawh chhuak turin beisei tur a la awm. Amaherawhchu Goan club an khel ṭha ta zawk a, Aizawl FC champion ṭuma midfield innghahna Alfred chu tlarhnungah a mualpho a, goal luhnaah Liberian player hian mawh a phur a, goal tam zawk an chhuah lo erawh an vannei.

Aizawl FC hian Churchill laka an tlawm hma hian Real Kashmir an hneh lo a, Zirtawpni tlai dar 5:00 hian table mawngphaha awm Indian Arrows an hmachhawn ang.