Real tan Bale goal a tawk

Ni 99 chhung La Liga bika goal a khung loh hnuah Gareth Bale chuan a pet goal ve leh ta. Pathianni zan khan Bale goal khat khung hmangin Real Madrid chuan table mawng­phaha awm Huesca chu 1-0 in an hneh a, champion an bei­seina an la chhawm nun zel.

Santiago Solari naute hian match 15 an khelh tawhah point 26 hmuin palina an ni mek a, hmahruaitu leh champion lai ni bawk Barcelona nen an inkarah point nga chauh a awm avangin rei lote chhungin an dinhmun a la danglam dawrh thei a ni..

Goal khat a tawk

Huesca mualah Real Madrid lamin goal khung turin an nghah rei a ngai lo, ṭan aṭanga minute riatna lekah Bale chuan right back Alvaro Odriozola-a ball cross chu boruaka a awm laiin a hlap nghal pawp a, keeper Milan Jovanovic tana dan hman lohin chiang zetin a lut.

Wales international hian goal hnihna khung theihna hun ṭha nei mah se mawi deuha a chip chu goal pawn chiahah a kal, hnai tak aṭanga Gonzalo Melero tauh chu goal ban hrul­ah a liam chiah bawk.

Real Madrid hian hnehna chang mah se inchhuang thei an ni bik lo. Thibaut Courtois chuan Moi Gomez-a free kick lut ngei tura lang chu ṭha zetin a dang hman a, corner aṭanga ball rawn kal Christian Rivera-a tauh pawh line aṭangin Dani Carvajal chuan a lo dang hman hram bawk a ni.

A vawi khat nana La Liga kheltu Huesca lamin beisei aiin Real an dang thei, an goal zawnah vawi li chauh an shot tir a, striker Karim Benzema chu goal zawna pet miah lo turin an dang bet thei a, an mikhual lakah ball chang tlem hret mah se an vanneih ṭum chu ni se point hlawh chhuak thei tur khawpin hun ṭha an insiam thei a ni.

Solari thukhawchang

Pathianni zan khan an inkhelhna hmun Estadio El Alcoraz velah thli a thaw nasa a, hei vang hian ball thunun leh in pass kual vel kawngah harsatna awm niin Real Madrid coach Solari chuan a sawi.

Real coach Solari chuan, "Thli vang khan nal leh mawi taka inkhelh a harsa. A chang chuan hmun harsa taka inkhelh a ngaih chang a awm a, hetiang hmuna point thum hmuh theih hi a pawimawh lai chu a ni. Player-te khan inkhelh harsa an ti hle. Kan khingpui lam tan erawh hmun nuam leh duhthusam a ni thei thung.

"Hun ṭha kan neih hma­sakah goal kan khung a, a hnu lamah chuan beisei angin a lut ta lo. Goal khat chauh khung mah ila tlarhnung lam kan inveng ṭha em em a, kan mamawh leh duh zat point chu kan hmu thei ta tho," a ti.

Gareth Bale leh Thibaut Courtois chungchang sawi zuiin Solari chuan, "Bale hian Roma-ah goal a khung a, tunah point thum min hmuh pui leh, team tan mi pawimawh tak a ni. Match ṭhenkhatah chuan goal thum emaw goal li khung theih loh chang a awm, hetiang hunah tak hian goal venhim a pawimawh zual ṭhin. Tun ṭumah khan Courtois chuan kan mamawh leh duh ang takin a khel," tiin a sawi.