VAR kan mamawh - Rafael Benitez

Pathianni zan Premier League inkhelah Newcastle chu Wolves lakah 2-1 in an tlawm a, an player an hnawhchhuah a nih bakah hun tawp dawna goal an chhuah danah Rafael Benitez a lawm lo - thutlukna dik siam turin video assistant referee (VAR) hman a duh thu a sawi.

St James' Park-ah Wolves lamin Jota hmangin minute 17-ah goal hmahruai an khung a, chawlhlawk hmain Ayoze Perez-a'n an si phurh sut nan a tauh lut bawk.

An inhnehtawk laiin Magpies defender DeAndre Yedlin chu hnawh chhuah a ni a, Perez titlutu Wolves defender Willy Boly-a'n penalty a chawi ngei dawnin lang mah se referee Mike Dean chuan a pe lo.

Player 10 ni chungin Newcastle lam hian hun tawp lam minute 30 vel chu an khelh a ngaih phah a, a tawpah an inveng seng lo. Diogo Jota-a goal shot ṭha zet chu dan per ni mah se Matt Doherty chuan a lo tauh lut a ni.

Newcastle manager Benitez chuan, "VAR hman a ngai, inkhel thunun turin kan theihtawp kan chhuah a, khatianga hun ṭha kan neih ang pawm sak kan nih loh chuan engtin nge kan sawifiah theih ang," tiin a sawi.

European league lian ṭhenkhat­ah chuan VAR hi hman a ni tawh a, football khawmpui lian ber World Cup-ah pawh hman a ni tawh. Season thar aṭang chuan EPL-ah pawh VAR hi hman a ni dawn. Club thuneitu leh FA lamin inremna an siam tawh a, international Football Asso­ciation Board leh FIFA nen inbiakna neih leh phawt tur a ni ang.