City vs Reds ; Pathianni zanah Premier League 'final'

Pathianni zan a lo thleng ang a, tlema inkhawm rei deuhten in sana leh thusawitu in en sek ang a, hla zir ngaite pawhin zir rei hlauthawng tak chungin in zir dawn - kan hre vek!

Mahse maw, inthlahrung duh suh - malin i awm lo. I nih ang tho hi kan ni dawn a, kan rilru a nghet dawn bik lo - Manchester City leh Liverpool an inkhel dawn tlat alawm.

Pathianni zan dar 9:00-ah Manchester City chuan Premier League 'final' tia chhal ngam inkhelah Liverpool an mikhual dawn - team pahnih inkarah point khat chauh a awm tih theihnghilh lo la.

City boss Pep Guardiola chuan, "Europe-a team ṭha ber pawl kan hmachhawn dawn tih ka hria a ni," tiin inkhel tur a thlirlawk - Pep leh Klopp te vawi 22 an intawng tawh a, vawi kua ve ve an chak a, vawi li an inhnehtawk.

Point khat
Kum 2018 khan Manchester City-in Premier League record thar an siam a, goal 106 zet khungin point 100 an hmu - Reds erawh table-ah palina an ni hram a, City an phak lohna chu point 25 ngawt a ni.

Mahse, thawk leh khatah thil ṭha a hmuh thut thei lo a, thawmhnaw mawi tak chu ni khat thil thua 'design' zawh chi a ni lo - Jurgen Klopp-a'n zawi zawiin hna a thawk a, Liverpool a thlak danglam hret hret.

Kum 2018-a City an champion hnuah khan Liverpool-in Premier League nomawi vawi khat an chawi ve leh tawh a, City la chawi loh Champions League nomawi an chawi tawh bawk.

Team inthlau tak kha team intiat tawk tak an ni a, 2019-18 season hnuah team pahnihin league match 144 ve ve an khel tawh a, point khat chiahin an inthlau - Pathianni zan an inkhelh hmaa an inthlauhna zat chiah a ni.

An ṭha

Klopp-a'n, "City hian chak lohna lai an nei lo - kil tinah an ṭha em em vek mai a ni," tiin a sawi a, a thusawi ṭawmpuitu an tam ang - mahse, Pathianni zanah City tan Ruben Dias a inlan theih a rinawm loh.

Dias a inlan loh chuan John Stones leh Aymeric Laporte te City tlarhnung laiah an inkawp a ṭul dawn tihna a ni a, a defender neih ṭhat ber tel loa tun season-a league goal (73 goals) khung hnem ber Reds mikhual hi Pep-a'n a châk lo ang.

Klopp-a'n, "Ka player zingah inhliam an awm lo," tiin a sawi a, chuti a nih chuan tlarhmaah Mohamed Salah, Sadio Mane, Diogo Jota, Roberto Firmino leh Luis Díaz te duhthlan tur an awm dawn tihna a ni.

Salah, Mane leh Diaz hi bul ṭan tura beisei an ni a, midfield-ah Benfica laka bul ṭan lo captain Jordan Henderson a rawn kir tawh ang a, Fabinho leh Thiago Alcântara nen an inkawp thei ang.

Intluk tawk
City-in khawvela full back inkawp fuh ber pawl João Cancelo leh Kyle Walker an nei a, City tan tlarhnunga an pawimawh tluk zetin goal nawr kawngah an ṭangkai dawn - tun season-a assist an neih belhkhawm hi 10 a tling.

Mahse, Liverpool-in tun season-a assist vawi 17 nei tawh Trent Alexander-Arnold leh vawi 14 assist nei tawh Andrew Robertson an nei a, City tan anni pahnih hi ball cross-na hun siamsak loh a ṭul ang.

City-in Kevin De Bruyne an neih hi an chhuan ber a ni a, Belgian midfielder hian tun season inelna hrang hrangah goal 13 khungin, assist vawi riat a nei a, inkhel tidanglam turin a ṭha tawk.

Atletico Madrid boss Diego Simeone-a'n, "Player ṭha em em pathum an la chhuak a, an tlukpuia ṭha pathum an luhtir thei," tiin City squad chhahzia a sawi a, Liverpool hneh tura an squad chhah tawk leh tawk loh a hriat thuai dawn e.

Treble vs Quadruple
European football-ah treble champion nih chu thil ropui tawpkhawk a ni a, quadruple champion phei chu an la awm ngai lo - City-in treble champion nih an tum a, Reds-in quadruple an beisei thung.

Mahse, inelnaa tel tam poh leh a hautak ṭhin - City hian Reds nen an inkhelh zawhah Champions League quarterfinal second leg khel tura Atletico Madrid an lenchilh a ngai dawn a, April 16 zanah Reds nen FA Cup semifinal an khel zui ang.

Phil Foden, Raheem Sterling, Riyad Mahrez leh Bernardo Silva te neitu Pep-a tan player siksawi thiam a ṭul dawn tihna a ni a, Champions League quarterfinal first leg-a 1-0 chauha chak kha an tuar.

Liverpool erawh Benfica khelmualah 3-1 in an chak a, Anfield-a inkhel tur lungkham lutuk a ṭul lo - rilru hahdam takin City an lenchilh thei. Klopp-a'n Benfica lakah thiam takin player a siksawi bawk - Portuguese club laka bul ṭan lo Joel Matip pawh Virgil van Dijk kawppui turin a lo kir thei ang.

He inkhela chak zawk hi miin champion tura an ngai a nih chuan an ngaihdan ka thlak thei lo. Kan chak chuan point hnihin kan sang a, mahse, a tawp ta angah tuin nge ngai ang? Kan tlawm chuan point liin kan hniam ang a, draw chuan point khat - chu zawng chu a ni mai.

Game pawimawh tak kan khel dawn a, ka châk tawh hle. Point 14 emaw 15 emaw pawhin hniam ila, inkhel ṭha tak a ni tho ang. Kan thawhrah sengin game ropui kan khel dawn a, chu chuan min tiphur a ni. Mi tam takin an en ang tih ka hria a, theihtawp kan chhuah ang.

City nen hei leh chen kan inel thei hi a ropui ka ti a, anni hnaih tumin theihtawp kan chhuah a, tlanpel an harsa dawn tih kan hre sa. Kum li chhung khan thil tam tak a thleng a, team tam zawkin min hmachhawn an châk lo a, chu chu thil ṭha tak a ni.

Infiamna khawvela min puitu pawimawh tak chu elpui ṭha tak neih hi a ni a, hun rei tak chhung a nih phei chuan a ṭha lehzual. Nadal leh Federer te hian elpui tur an innei reng hi nuam an ti ngawt ang - chu chu infiamna khawvela thil awm dan chu a ni.

City an ṭhat em avang hian ka lawm, tiin ka sawi thei hauh lo ang a, mahse, kan hmasawnna erawh an dal lo tih ka hria. - Jurgen Klopp, Liverpool boss

Liverpool leh keini hian Premier League hlutna kan tisang lehzual a ni. 2017-18 khan point 100 kan hlawh a, 2018-19-ah point 98 kan nei a, annin 2019-20 khan point 99 an nei a, kan pahnih hian team dangten he inelna an thlir dan kan thlak danglam a ni.

Premier League-ah hian team panga emaw paruk emaw kha an inel ṭhin a, mahse, tun hnai kum nga chhung erawh team pahnih chiah kan inel a, team pahnih kaltluanzia a pholang. Miin Liverpool chungchang an sawi hi awm ka ti - mi tam takin inkhel an en ka beisei a, team ṭha tak pahnihin Premier League champion nih kan inchuh dawn a ni. - Pep Guardiola, City manager