India tan Mizo an vul zel

FIH Junior Women's World Cup-ah India chuan semifinal an lut. Mizo pathum telna India hmeichhe team hian nimin khan South Korea chu 3-0 in an hneh a, Hnahthial tleirawl Lalrindiki chuan India tan goal khat a khung.

April 10, Pathianni tlai dar 5:00 hian India chuan semifinal-ah Netherlands an hmachhawn leh dawn. Nimin quarterfinal inkhel hnuhnung zawkah Dutch team hian a thlengtu South Africa chu 5-0 a sawpin semifinal an in vaw kai ve bawk.

India tan Lalremsiami Hmar leh Marina Lalramnghaki ten bul an ṭan. Siami hi midfield-ah chhawr ṭhin a ni a, goal venhim hna thawk turin Marina-i hi tlarhnungah a ding thung, bul ṭan lo mah se Didiki ropuina a nep chuang lo.

Wales laka goal khung tawhtu Didiki hian minute 15-naah goal a khung, India tan Mumtaz Khan (11') leh Sangita Kumari (41') ten goal khat ve ve an khung bawk a, harsa lo takin quarterfinal an paltlang.

Indian hian pool match pathumah Wales, Germany leh Malaysia te an hneh vek a, heng inkhelah hian Mizo player an pawimawh vek. Quarterfinal-ah pawh Remsiami, Didiki leh Marina-i ten hmun pawimawh an chang.

Semifinal erawh a awlsam dawn lo. Netherlands hi pool A hmahruaitu an ni a, an khingpui apiang an sawp zel. United States (10-0), Canada (11-0) leh Zimbabwe (18-0) te lakah goal an surtir nasa a, nimin tlaiah pawh goal khung nuam an la ti hle.

India Results
Group Match
India 5 - 1 Wales
IND: Lalremsiami Hmar 4'; Lalrindiki 32', 57'; Mumtaz Khan 41'; Deepika 58'
India 2 - 1 Germany
IND: Lalremsiami 2'; Mumtaz Khan 25'
Malaysia 0 - 4 India
IND: Mumtaz Khan 10', 26', 59'; Sangita Kumari 11'
Quarterfinal
India 3 - 0 South Korea
IND: Mumtaz Khan 11'; Lalrindiki 15'; Sangita Kumari 41'
Semifinal - April 10, Pathianni
India 5:00 PM Netherlands