EPL palina nih inchuh inlan hun
An tan Premier League nomawi chu a sang lutuk a, an ban phakah a awm tawh lo. Palina nih phak pawh thil harsa a ni dawn - Manchester United, Arsenal leh Tottenham ten hmun ruak pakhat an inchuh chho dawn.
Manchester City leh Liverpool ten nomawi an inchuh a, pathumna Chelsea pawhin an dinhmun an hum thei tura ngaih a ni. Chuvangin Champions League khelh theihna ticket pakhat chauh inchuh tur a awm.
Ronaldo a dam
Manchester United match hnuhnung berah Cristiano Ronaldo chu damlohna vangin a inlan lo, tunah erawh training a zawm pangngai tawh. Vawiin tlai dar 5:00-a Everton an mikhual hunah bul ṭan turin a inpeih tawh ang.
Team pahnih hi beisei anga season hmang ṭha lo an ni. Ronaldo awmna Man United hi season hma lama pahnihna kha an ni a, kuminah palina nih phak loh chu mualphona a ni dawn - tlak hlau Everton laka point thum hmuh ngei an tum dawn.
Kum 37 mi Ronaldo hian boruak sang leh hun khirhah player ṭha bik a nihna a lantir ṭhin. Hun harsa an tawk mek a - Man United ṭantuten an beisei ang chhandamtu a la ni thei reng em, tih chu fiah a ni ang.
Arsenal an buai
Crystal Palace an hneh loh ṭumin Thomas Partey a inhliam. Zanin dar 7:30-a Arsenal leh Brighton inkhelh hunah Gunners midfielder hi a inlan theih a rinawm loh a, manager Mikel Arteta-a'n midfield a siksawi a ngai dawn.
Defender Kieran Tierney pawh tun season-ah an chhawr theih a rinawm tawh lo a, Scotland international Tierney inhliam ringawt pawh an tan buaina a tling tawk tawh, midfielder pawimawh a inhliam belh leh hian Arteta lu a tihai khawp ang.
Partey hmun ruak luah turin Albert Sambi Lokonga a awm thei dawn. Belgian midfielder hi Granit Xhaka nen an inkawp thei ang, tlarhnung erawh Palace laka rintlak loh Nuno Tavares tel loa inrem dan an ngaihtuahin a rinawm.
Spurs beiseina
Antonio Conte-a'n Tottenham a enkawl hnuah thu hrang hrang a sawi a, ngaihdan pawh a thlak fo. Tuna a thusawi thar berah chuan palina nih phak an beisei, an elpui Man United leh Arsenal result hre lawk chungin zanin dar 10:00-ah Aston Villa an tlawh dawn.
Spurs hian Harry Kane leh Son Heung-min an neih miau avangin a ṭha pali zinga tel phak an tum ngam hi a mak lo. Chutihrualin palina ni mek mah se Arsenal nen an point a inzat a, match khatin an khel hnem thung.
An khelh hmabakah North London Derby a la awm dawn, Italian manager Conte naute hi an khelh hmabakah an chak vek a nih chuan Arsenal chungah an awm dawn tihna a ni a, mahse chu erawh thil awlsam a ni dawn lo.