April Full IPL
TATA Indian Premier League conference ṭum 15-na chu tluang takin an khuh hawng a, bul kan ṭan chauh emaw kan tih laiin, group stage round 14 inkhel awm turah round 4-na kan lo thleng chho leh ta reng mai.
Team leh player-te mai ni lo, khawvel puma cricket ngainatute pawhin thawk kan la hman meuh lo. Zantin mai mit leh beng tlai em emin kan hun kan la hmang zel a nih hmel hi maw!
Ṭhumvawr leh Thim hlim Dai
Ṭum dang IPL ang bawkin ṭhumvawr a chak captain-ten vawm hmasak an la thlang zel. Lehlam pawlte vuak chhuah zat zat um tura an vuak ve huna gear thlak dan tur duan lawk chu kalphung pangngai a ni rih.
A ni lah taka, kumin IPL inkhel kan la hmuh china hnehna changte za zela sawmriat te chu a vaw hnuhnung zawk team te an la ni zel hrih a nih hi. Maharashtra nipui khaw lum, zantir boruak inlumlet, a piah lawk Arabian tupuiin boruak awm dan a rawn sawi danglam hle.
India sana a zan dar 8:30 chho vela dai namen lo rawn tla ṭhin chuan, khelmuala phaitual hnim chu fur vanglai ruah tui tla ang maiin a ti hnawng a, ball hman huh ta ṭhin chuan vawm thiamte thenthiamna nasa takin a ti khaihlak tih a chiang.
Pitch aṭangin ball rawn sawt vuak nuam tawk chiahin a rawn kal ta ṭhin bawk nen. Batter-te tan hun ṭha a inher chhuak ta ṭhin a, hetiang hi a kalphung a la ni hrih zel dawn a nih hmel bawk!
Pa lian Mutthlu
IPL history a record nei ṭha pahnih, team ropui Mumbai Indians leh Chennai Super Kings-ten vawi thum ve ve an inlan thawh a, hnehna la chang miah lo. Lei rem an la rap lo tih a chiang a. Palian muthlu ṭhangharh hi khawvel lasi thawnthu ngaihnawm ber a nih rualin, an muthlu ṭhangharh hman lova, an mut tlang mai te pawh a hlauhawm ta.
Chutihrual chuan heng team pahnihte tun ang dinhmun aṭanga rawn inhai chhuak leh tur hian, an player-te tawnhriat neih leh a hnar kaitute en chuan, rinkai ber erawh an la ni fan ka ti. Zanin inkhela inlan ve ve tur an ni a, lamtuang dika an inher hun ni tak maw?
Present Sir/Absent Sir
Kumhlui lama Honeymoon hun nuam hmang emaw tih mai tur, India team a koh loh theih loh khawpa khel ṭha Venkatash Iyer leh Ruturaj Gaikwad ten a bat hum ngai reng hmangin, kum em pawh a ral hmain, an run siamtheihna lui hnar a kang chat thut.
Cricket ball vuak tilang awlsam deuh te khan, tun season ah erawh run khat vuak chhuah pawh a har zia khawvel hmuah an lantir a nih hrih hi maw. Chutirualin, India team-ah pawh a dinhmun derthawng tana ngaih Umesh Yadav a te lahin 'drip' ṭha mi an khai emaw tih mai turin, kumin IPL bul an ṭan ṭha lawi a, rawlthar tuma la hmelhriat lem loh Thilak Verma te poster India ramah hralh a kal ṭan bawk. Infiamna khawvel hi zawng a lo ropui a ni e, ti mai ang aw!
Mizoram IPL
Hetia IPL kutpui kan hmang mek lai hian, Mizoramah lamah pawh kan international standard Cricket Stadium neih, Sihhmui lamah karthar aṭang hian Mizoram IPL kan tih cheng nuai 30 chuang vir vela tur team paruk inelna Mizoram Cricket League chu khuhawn a ni veleh dawn.
Ṭum dang zawng aiin, boruak a sangin IPL lama sponsor-tute leh khawvela hmuha pho chhuaktute company leh broadcaster ho tho rawn pen chhuakin, Mizoram leh India ramah T20 inkhawmpui lian mei a de chuah chuah mai kan ti thei awm e.
Heng thlen theih nana sulsutu Cricket Association of Mizoram GS leh IPL governing Council a tel mek Mamon Majumdar leh Mizoram Cricket lama a thawhpuite fak an va phu em.
Tin, LPS chhungkua te thawhhlawk zia hi kan thailang lo thei lo. A buatsaih tupa ngei pawh hi, khelmual lam thlan tla leh hahthlak lai hnuchhawn tawh a, kil khata inchei taka ṭawng leh awka hmanga lo ti choṭani tu ni tawhin, petired player-te chanpual lam hawiin cricket kawng thar ka zawh chho mek e.
- K. Vanlalruata