Marquez a lo kir dawn

Pathianni zan dar 11:30 hian Grand Prix of the Americas tlan a ni dawn. Austin, Texas-a inelna neih turah hian Marc Marquez a inlan thei dawn, intlansiak a hmachhawn tur thu hi an puang chiang tawh.

Thla hmasa khan Indonesia GP-ah Marquez hi a chesual, hliam na tak tuar lo mah se kar hmasa a tlan Argentina Grand Prix-ah a inlan thei lo. Tunah erawh Honda rider hian inelna a hmachawn thei leh tawh dawn a ni.

Spanish rider chuan, "Intlansiak pahnih chu engmah lo maiah a chang leh ta, a pawimawh zawk erawh tun kar tawpa ka intlansiak thei ve leh tawh tur hi a ni," tiin a sawi a, a ṭha ber ni tur erawh chuan hun a mamawh deuh ang.

MotoGP vawi ruk champion tawh hi 2020 khan na takin a inhliam, a hliam hian season hmasa pawh kha a la nghawng. Kuminah beisei angin bul a ṭan thei leh ta lo a, world title a neihsa ti pung leh tur chuan hna a hautak tawh ang.