Europa League ; Barca tan Torres, West Ham an chelh

Europa League quarterfinal first leg-ah Sporting Braga chiahin hnehna an chang a, Portuguese club hian Rangers 1-0 in an hneh. Inkhel dangah RB Leipzig leh Atalanta, Eintracht Frankfurt leh Barcelona bakah West Ham United leh Lyon te 1-1 vekin an inhnehtawk.

Quarterfinal second leg hi April 14, Ningani zanah khelh a ni dawn a, semifinal lut tur hriatthiam a la har hle. Semifinal-ah hian RB Leipzig leh Atalanta inkhela chak zawkin Braga leh Rangers inkhela chak zawk an hmachhawn ang a, Barca leh Frankfurt inkhela chak zawkin Hammers emaw Lyon emaw an hmachhawn ve bawk ang.

Barca tan Torres
Deutsche Bank Park-ah Frankfurt tan Ansgar Knauff-a'n mawi zetin minute 48-naah box pawn aṭangin Barcelona lamah a khung. Nikum December hnua a vawi khat nan Xavi hote chak lo thei dinhmunah an ding a, amaherawhchu team ṭha zawk Catalan club tan Ferran Torres-a'n minute 66-naah siphurh a sut.

Barca-in goal an khung theih nan Torres leh Frenkie de Jong te an inthlawp ṭha a, wall pass hmangin Frankfurt tlarhnung an ṭhiat nalh hle. Minute 78-naah Frankfurt defender Tuta hnawhchhuah a ni a, Catalan club-in an tamna an hmang ṭangkai thei lo.

Spanish club hian match 22 chhung hneh loh an tawng tawh lo a, chutihrualin Frankfurt lakah erawh inkhel thunun chungin vanduai thei an ni. English referee Michael Oliver-a'n first half-ah Frankfurt hi penalty pet zet mah se mual sir 'monitor' aṭanga a ennawn hnuah thutlukna a sut. Second leg hi Nou Camp-ah khelh a nih dawn avangin Barca tan semifinal kawng a inhawng zau hle.

Hammers an tlo
London Stadium-ah West Ham leh Lyon te an inhnehtawk hle. First half-ah goal lut lo mah se injury time-ah Hammers defender Aaron Cresswell-a'n goal khung thei dinhmuna ding Moussa Dembele a tih tluk avangin an hnawt chhuak.

Second half-ah Lyon-in bul ṭan ṭha mah se player 10-a khel Hammers-in goal an khung hmasa zawk. Minute 52-naah Lyon defender Jerome Boateng-a tihsual vangin Jarrod Bowen-a'n goal pawimawh a khung. Lyon-in siphurh an sut leh tho a, substitute Tete chu Ryan Fredericks-a'n a clear ṭhat tawk loh avangin Tanguy Ndombele-a'n awlsam takin a khung.

Lyon-in an tamna an hmang ṭangkai thei lo a, Hammers-in goal dang an chhuah loh avangin second leg inkhel a nung sawt ang. David Moyes-a hote hi ṭha zawka ngaih ni mah se Lyon hian tun season Europa League match kuaah hneh loh an la tawng lo.

Europa League
Quarterfinal
First Leg - April 7, Ningani zan
RB Leipzig 1 - 1 Atalanta
RBL : Davide Zappacota 58' (OG)
ATA : Luis Muriel 17'
Eintracht Frankfurt 1 - 1 Barcelona
FRA : Ansgar Knauff 48'
BAR : Ferran Torres 66'
West Ham United 1 - 1 Lyon
WHU : Jarrod Bowen 52'
LYO : Tanguy Ndombele 66'
Sporting Braga 1 - 0 Rangers
SPO : Abel Ruiz 40'

Note: Second leg hi April 14, Ningani zanah khelh a ni ang.