Ferrari beisei a sang chhunzawm

Pathianni chawhma dar 10:30-ah Formula 1 Australian Grand Prix an tlan dawn, season bul ṭan fuh tak Ferrari leh Charles Leclerc ten beisei an nei sang - nimina tlanchhinna an neih hmasak berah pawh Leclerc a chak ber.

Leclerc bakah a teammate Carlos Sainz pawh a tlan ṭha, intlansiak tak an tlan hunah pawh rinkai an ni leh dawn. Tlanchhinna an neih chin aṭanga a lan dan chuan Red Bull nen na takin an inel leh ngeiin a rinawm.

Team champion lai Mercedes erawhin beisei an la phak thei rih lo, vawi sarih champion tawh Lewis Hamilton-a'n season hmasa an phak loh thu a zep lo a, team lam pawhin an ṭhat tawk lohna siamrem tumin thapui an thawh reng.

Britain tlangval Hamil-ton chuan, "Intlansiak hmasa kan neih hnuah thil tih danglam kan nei, car kan tih danglam hian tun dinhmunah chuan kawngro a la su lo niin ka hria," tiin a sawi a, team chet danah a lungawi chiah lo a nih hmel.

Intlansiak hnuhnung berah khan Mercedes driver pahnih - Hamilton leh George Russell te hi podium an lawn phak lo, tun ṭumah pawh hian a sang pathum zinga tel phak a harsa leh dawn.