Badoni-a'n Super Giants chakpui

Ningani zan khan Indian Premier League-ah Delhi Lucknow Super Giants chuan Delhi Capitals chu wicket rukin an hneh. Super Giants-in hnehna an chan theih nan Ayush Badoni-a'n ball thum lek aṭangin 10 runs a, ball hnih chiah dah bangin an chak hram.

Dr. DY Patil Sports Academy, Navi Mumbai-a inkhelah Lucknow-in vawm hmasak an thlang. Capitals tan Prithvi Shaw (61), Rishabh Pant (39*) leh Sarfaraz Khan (36*) te che ṭha mah se 149/3 runs chauh an siam.

Super Giants tan target harsa niin lang lo a, Quinton de Kock-a'n 80 runs siam mah se hun tawp lamah boruak a sang. Over tawp berah Shardul Thakur-a'n Deepak Honda a vawm hlum a, Lucknow tan chak turin ball ngaah 5 runs siam a ngai. Badoni a rawn lut a, kum 22 mi Delhi tlangval hian a tawp a rawn thlenpui.

Vawiinah inkhel pahnih a awm dawn. Tlai dar 3:30-ah chak la nei lo Chennai Super Kings leh Sunrisers Hyderabad an inkhel ang a, zan dar 7:30-ah Royal Challengers Bangalore leh Mumbai Indians te an inkhel ang.

Pathianni tlai dar 3:30-ah Kolkata Knight Riders leh Delhi Capitals an inhmachhawn dawn a, Delhi hnehtu Super Giants-in zan dar 7:30-ah Rajasthan an hmachhawn leh bawk ang.