MYC chairman-in MPL Under 18 kickoff

Mizoram Premier League Under 18 (2021-2022) chu April 8, Zirawpni zan khan Vaivakawn YMA Hall-ah Mizoram Youth Commission chairman Dr. Vanlalṭanpuia'n a kick off. Inelna hi April 12, Thawhlehni aṭangin Lammualah khelh ṭan a ni ang.

MYC chairman Dr Vanlalṭanpuia chuan, "MYC hi ṭhalaite tana ding a nih angin kawng hrang hrangah ṭhalaite hmasawnna turin hna a thawk. Ṭhalaite football-a eizawnna kawhhmuh kawngah MFA nena thawhho zel kan tum.

"Tunlai khawvel inelna sang takah a sang ber nih theihna Mizo ṭhalaiten an nei a, chumi thleng tur chuan beih nasat a ṭul. India aiawha khel thei turin khawpin thawk rim ula. Zuk leh hmuam tih loh mai hi a tawk lo, ei leh inah pawh a fimkhur a ṭul a ni," tiin a sawi a, MYC-in kawng hrang hranga ṭhalaite eizawnna an kawhhmuh tawh dante a sawi lang bawk.

MPL U18-ah hian team pariat Aizawl FC, Chanmari FC, Chhinga Veng FC, Electric Veng FC, FC Bethlehem, FC Chawnpui, FC Venghnuai leh Mizoram Police FC te an inel dawn a, kickoff zan hian captain-te ṭheuhin 'oath taking' an nei nghal.

Oath taking hi ISL club Odisha midfielder Jerry Mawihmingthanga'n a kaihruai a, Chanmari tlangval Jerry hi MPL U17 inelna hmasa pahnihah best player leh top scorer a ni kawp ve ve. MPL kum bitihliah inelna hi a tirah chuan kum 17 tana buatsaih a ni a, season thumna aṭangin kum 18 hnuai lam tana buatsaih ṭan a ni.

MFA aiawha thusawitu MFA honorary secretary Lalnghinglova Hmar chuan, "Football-ah hian khelmualah chauh ni loin khelmual pawn thlengin eizawnna tur a awm. Khelmual pawna eizawnna tur khawp thiamna nei turin Mizote kan ṭan a ṭul a, MYC-in chumi kawngah puih a inhuam reng a ni. Khelmuala chhunga ei zawng zui thei lo tán coach education, referee education leh football management lamte ngaihven theih a ni," tiin player-te a chah.

Tun season MPL Under 18-ah hian team pariatte hi vawi khat ṭheuh an inkhelh chhuak dawn. League round-a ti ṭha team paliin April 27, Nilaini hian semifinal an khel ang a, final hi April 30, Inrinniah khelh tura ruahman a ni.

MPL Under 18
Round 1 - April 12, Thawhlehni
Chanmari FC 09:00 AM Electric Veng FC
Mizoram Police 11:00 AM FC Venghnuai
Aizawl FC 01:00 PM FC Bethlehem
Chhinga Veng 03:00 PM FC Chawnpui