Man United leh Arsenal tlawm niah Spurs an nui
Premier League palina nih tum zingah Manchester United leh Arsenal an chak lo, an elpui pahnih an chak lo tih hre sain Tottenham Hotspurs an inlan - forward Son Heung-min hattrick hmangin Spurs hian Aston Villa 4-0 in an hneh.
Inrinni tlai inkhelah Cristiano Ronaldo hoin Man United an feh chhuak a, tlak hlau Everton mualah 1-0 in an chak lo. An chak loh chanah manager Ralf Rangnick-a'n player thlan chungchangah thutlukna a siam fuh tawk lo tia sawi theih a ni.
Arsenal pawh an ropui chuang lo. Crystal Palace laka mualpho hlim hian Brighton an mikhual a, tun hnaia chak hleithei lo team lakah Mikel Arteta naute hi 2-1 in an tlawm; Gunners hian an elpui Man United leh Spurs kalsan theihna remchang vawi hnih an neih chu an bawhpelh.
Everton an chak
Goodison Park-a inkhelah Man United lamin Fred leh Nemanja Matic te bul an ṭan rual tir a, Brazil international midfielder Fred hi chawlhlawk hmain Paul Pogba-a'n a thlak ngai khawpin a talbuai. Matic pawh a hnuah thlak a ngai zui.
Khelhna hmun chang tam lo Marcos Rashford-a'n keeper Jordan Pickford tan hna hautzek zet mai vawi hnih a siamsak a, mahse a shot leh hnai tak aṭanga a tauhte chu England keeper hian rang takin a lo dansak.
Hun ṭha nei mumal lo Everton tan Anthony Gordon-a'n a long shot a, captain Harry Maguire-a'n lo dang pialin keeper David de Gea tan dan ngaihna a awm tawh lo; Spanish keeper hian a hnuah Richarlison khung tur erawh ṭha zetin a dang.
Frank Lampard-a nauten point an hmuh theih nan Pickford a khel ṭha hle, inkhel chawhnu lamah pawh Ronaldo leh Pogba te khung tur a dansak a, an tan point thum hmuh hi hlu tak a ni - season thara Premier League khel zui turin beiseina an nei thar.
Arsenal an chuai
Hmanni lawk kha chuan, match khel tlem zawk chungin Tottenham chungah an awm ṭhin. Tunah erawh thil a inthlak thut a, an khelh hmabakah chak pawh ni se Gunners hi Spurs hnuaiah an awm a ngai rih dawn.
Emirates Stadium-ah defender atan hman Granit Xhaka a tawlh hma lutuk a, a hmun ruakin Brighton lamin hmun awl zau hmuin Leandro Trossard-a'n goal mawi a khung theih phah a, forward Gabriel Martinelli-a'n sut nia a inngaih erawh VAR hmanga rei tak an en hnuah an hnawl.
Goal an khung tum luatah Arsenal an inveng seng lo, tlarhnung pawp bakah mawi taka ball an inpek kual hnuin Enock Mwepu hmangin goal mawi bawk an khung. Hun tawp dawna Martin Odegaard-a goal pawh mawi viau mah se awmzia a nei phak lo.
Arteta chuan, "Harsatna hi kan insiam chawp a ni, ka che muangin goal nawr tuin chakna kan nei lo. Match khelh hmabak kan la ngah, tun ṭuma first half kan khelh anga khelh erawh a remchang tawh lo ang," a ti. May thlaah North London Derby an la hmabak.
Asian tlangval
Antonio Conte-a'n tuk leh din fawmin Tottenham a kaihruai a, tunah zet chuan an dingnghet leh ta. Son Heung-min-a'n Harry Kane shot per let chu laklawh nei loin a hlap lut a, striker Kane-a ball tauh bawk fal taka tlan puiin a khung.
South Korea international hian a la duhtawk mai lo. EPL-a hattrick vawi hnih a siamna ni turin player thar Dejan Kulusevski-a siamsak a khung leh bawk. January thlaa an lak Kulusevski hian goal khat a khung ve bawk a, team boruak siam danglamtu a ni chhunzawm.
Spurs manager Conte chuan, "Kan elpui Wolverhampton, Manchester United leh Arsenal an tlawm laia chak bik chu a hlu takzet. Team ṭha kan nihzia kan lantir a, a bik takin goal thum khungtu Son khan a hna a thawk ṭha hle," a ti.
Italian manager hian hmanni lawk khan, "Palina ni phak tur chuan thil mak a thlen a ngai," tiin a lo sawi tawh. Thla hnih pawh a lian hmain season thar Champions League ticket chu an kuta awm a ni leh der tawh a, thlauh loa chelh zui ngei an tum ang.