Goal ruk khungtu Chelsea

Premier League kai thar Brentford lakah an mualpho a, an mikhual Real Madrid lakah an tlusawp zui bawk. Thomas Tuchel-a enkawl Chelsea an chesual zui dawn em tih khawvelin a thlir - goal ruk nen an rawn tho chhuak leh hem mai.

Southampton mualah Blues hian an duh hun hunah goal an khung emawni tih mai tur a ni. Hliam vangin striker Romelu Lukaku inlan thei lo mah se an buai lo, chawlhlawk hmain goal li an nei hman.

Mason Mount leh Timo Werner tean goal hnih khungin, defender Marcos Alonso leh Kai Havertz ten goal khat ve ve an tawh bawk. London club hian league nomawi an beisei ngam tawh lo a, pathumna ni tur erawhin an dinhmun a ṭha tawk.

Chelsea manager Tuchel chuan, "Boruak danglam hip kan mamawh a, kan mamawh ang ngeiin thil a thleng. Kan mangchhia kha kalsan a ngai reng a ni, tuna kan chakna hian kan zavaiin kawng dikah min hruai rawh se," a ti.

Thawhlehni zanah Blues hian Champions League khel turin Real Madrid an tlawh dawn, inkhel hmasaah 3-1 in chak lo mah se beisei an nei ngam dawn. Inrintawkna sang tak nan Spain khawpui Madrid an pan thei ang.