Leclerc a tlan chak ber

Ferrari chuan team ṭha an nihna an lantir leh ta. Car sen khalhtu Charles Leclerc-a'n nimin chawhma lama tlan Australian Grand Prix-ah hnehna a chang a, season kal laia vawi hnih hnehna a channa niin fal takin hma a hruai.

Champion lai Max Verstappen erawh a tlan tluan ve thei lo. Red Bull driver hi tun season intlansiak pathum awm tawh zinga pahnihah a tlan tluan thei lo, nomawi humhim tur chuan kawng a harsa tawh dawn.

Ferrari an chungnung
Tun hnai season sarih chhung vel chu Ferrari hian beisei an phak lo. Mercedes leh Red Bull an phak loh em avangin an tlahniam hman viau, kuminah erawh nasa takin hma an sawn - an driver Leclerc chu champion tura rinkai a ni mek.

Qualifying aṭangin Leclerc a che ṭha, a hmasa ber aṭangin a tlan ṭan. Sebastian Vettel nena an inkawp lai pawha sawi kai Leclerc hi a rilru a la huaisen reng a, harstana lian tham tawk loin hnehna a chang.

Carlos Sainz erawh a vanduai thung, intlansiak tir lamah midang tlan pelh a tumna lamah chesualin a tlan zui thei tawh lo. Tun ṭumah hian point hmu lo mah se, intlansiak hmasa pahnihah point 33 a neih hman avangin championship-ah pathumna dinhmun a luah.

Red Bull an buai
Intlansiak hmasa ber Bahrain Grand Prix-ah Red Bull driver pahnih Max Verstappen leh Sergio Perez te an chesual a, intlansiak pahnihnaah champion lai Max tho chhuak mah se, tun ṭumah chuan intlansiak tlan tur hmun thuama ṭhen hmun hnih an tlanin khawl lam chiang lo vangin a tlan zawm thei lo.

Red Bull team hotupa Christian Horner chuan, "Tuialhthei chiang lo a ni mai thei," tiin an khawl chhiat chungchang a sawi a, a nihna tak erawh an la hre thei lo. Inelna pathum neih tawha vawi hnih khawl a chhiat chuan in enfiah an ngai hle tihna a ni.

Dutch tlangval Verstappen tan championship lamah Ferrari driver umphak a harsa tawh dawn. Chutih rualin intlansiak hmabak 20 a la awm, season khat chhunga inelna neih hnem ber ṭum a nih dawn avangin kawng erawh a la inhawng reng.