NorthEast Derby-ah Aizawl FC an chak

Aizawl FC chuan Inrinni zan I League inkhelah Neroca chu 2-0 in an hneh a, club academy chhuak Lalremsanga Fanai leh Ayush Dev Chhetri ten goal an khung.

Kalyani Stadium-a inkhelah hian Mizo club-in bul an ṭan ṭha a, minute ngana lekah Ramhlunchhunga cross luh chu Remsanga'n a tlawh lut. Lengpui tlangval Remsanga hian a huaisen zarah a goal a khung.

Aizawl FC an che ṭha a, Dinthar tlangval Ayush Chhetri chuan box pawn aṭangin mawi zetin minute 54-naah a hlai lut. Neroca hian goal hniha an hnufual hnuah Yan Law hote an nawr thei chuang lo a, Mizo club an khel ṭha hle.

Mizo club hian point thum hlu tak hlawh chhuak mah se championship stage khelh a harsa tawh dawn. I League-ah hian vawi khat ṭheuh an inkhelh kual zawhah a sang pasarihin champion tur an zawng dawn a, pariatnaa awm Aizawl FC hian pasarihnaa awm Rajasthan FC chiah an lehpel thei tawh.

Nizan khan Rajasthan-in Real Kashmir an hmachhawn a, I League kai thar hian hnehna a chang a nih chuan Mizo club tana championship stage khelh beiseina a tawp ang. Aizawl FC hian match khat chiah an khel tawh dawn a, April 14 tlai dar 3:00-ah Sreenidi Deccan an hmachhawn ang.