Neymar leh Mbappe ten hattrick an siam

Paris St-Germain tan Neymar leh Kylian Mbappe ten Clermont lakah hattrick an siam a, forward pahnih an chet ropuina phenah hian Lionel Messi a awm - Barcelona captain hlui hian assist vawi thum zet a nei.

PSG hian season tir lamah goal khung an harsat, tun hnaiah erawh tlarhma lam an inkawp rem viau. An match hnuhnung pahnihah goal 11 tehmeuh an khung a, anmahni lamah goal hnih chauh a lut.

Khawvel player man tam ber Neymar chuan, "Season kal laia a vawi khat nan hattrick ka siam thei hi ka lawm, a pawimawh zawk erawh team thawhhona ṭha tak hnuaia point thum kan hmu hi a ni.

"Kan in man tlang tawh hle. Leo leh Kylian te hi player ṭha chungchuang bik an ni a, anni ka khelhpui thei hi ka vannei," tiin tlarhma lama a kawp pahnihte a fak bawk.

Mauricio Pochettino naute hian Ligue 1-ah point 71 an hmu a, khelh zat inangah Rennes aiin point 15 zetin an sang fal. Nizan khan pathumna Marseille an inlan a, an chak a nih chuan PSG san falna hi point 12-ah a hniam leh ang.