Real Madrid-in champion an hnaih zel

La Liga-ah Real Madrid chuan hmahruaina belhchhah turin Inrinni zan khan Getafe 2-0 in an hneh. Santiago Bernabeu-a inkhelah Los Blancos tan Casemiro leh Lucas Vazquez ten goal an khung.

Real Madrid manager Carlo Ancelotti chuan player pawimawh Karim Benzema, Casemiro, Vinicius Jr leh David Alaba te chu a la chhuak a, Thawhlehni zana Chelsea nen an inkhel tur atan a hahdamna hun a peah a ngai theih. Spanish club hian Stamford Bridge-ah 3-1 in hnehna an chang a, Champions League semifinal lut turin an dinhmun a ṭha hle.

Inkhel dangah Sevilla-in Ramon Sanchez Pizjuan-ah Granada an mikhual a, chak turin vanneihna an mamawh. Granada-in minute 23-naah Darwin Machis hmangin hma an hruai a, Sevilla-in Diego Carlos (32') leh Lucas Ocampos (66') hmangin an lehthal.

Granada-in minute 88-naah Victor Diaz Miguel hmangin siphurh an sut a, hun tawp boruak a sang. Injury time-ah Julen Lopetegui hote tan Rafa Mir leh Papu Gomez te goal an khung a, Sevilla 4-2 in an chak hram.

Sevilla hian point thum an hmuh avangin pahnihna dinhmun luah mah se Carlo Ancelotti hote hi match 31 khelh zawhah point 12 ngawtin an la pha lo. Real Madrid hian point 72 an hmu tawh a, champion la inbeisei Barcelona aiin point 15-in an hmu tam zawk.

Chutihrualin Xavi hote hi match hnihin an khel tlem zawk tih hriat a ṭha a, nizan khan Catalan club hian Levante an tlawh a, hnehna an chan chuan pahnihna dinhmun an luah leh thei ang.

Atletico Madrid erawhin an mikhualna hmun Iberostar Stadium-ah Mallorca 1-0 in an hneh lo a, Diego Simeone hote palinaah awm chhunzawm mah se season thara Champions League khel turin chetsual nawn a thiang tawh lo.