India tleirawlte tawpna semifinal

Hockey hmanga khawvel huap tleirawlte inelna - Women's FIH Hockey Junior World Cup khelh laiah India chuan final an lut zo lo. Mizp pathum telna India team hi nimin tlai khan semifinal-ah Netherlands lakah 3-0 in an chak lo.

Potchefstroom, South Africa-a inkhelah Netherlands tan Beetsma Tessa, Dickle Jip leh Fokke Luna ten goal an khung a, pumraw te zawk India lamin a chhanletna tur an nei lo.

India tan hian Lalremsiami Hmar, Lalrindiki leh Marina Lalramnghaki ten World Cup-ah hian hmun pawimawh an chang a, final thleng ta chiah lo mah se khawvel huap inelnaa a langsar pawl an ni pha hi a ropui hle.

Nizan khan semifinal inkhel pakhat zawkah England leh Germany an inhmachhawn a, result kan hre hman lo. A chak lo zawk nen India hian April 12, Thawhlehniah pathumna an zawng ang.

Inkhel chu
Marina Lalramnghaki hoa ding India defender-ten Netherlands hmatawng an veng uluk a, match hmasa palia goal 33 khung thei an hmachhawn avangin an fimkhur hle. Inveng uluk viau mah se minute 12-naah Beetsma Tessa an veng seng lo.

India hian sut let theihna remchang an nei nghal, a zawnin penalty corner vawi thum ngawt hmu mah se an chhawr ṭangkai thei lo vek. Mual dinglam sir aṭangin Dutch team lamin an bei ṭhin a, an ball pass a dikin a mawi ṭhin takzet.

Kolasib nula Remsiami midfield-ah dah niin inkhel khaikhawmtu a ni a, an lama goal tur ṭum thum ngawt a dang.

India dinhmun
Hockey ngainatna ram India hian tun hma chuan chhuan tur result ṭha a nei ṭhin. Ram changkang leh ram lian dangten tih takzeta an khelh hnuah erawh India-in tun hma lama a ropuina ang kha a tawng phak ta meuh lo.

FIH Women's Hockey Junior World Cup-ah pawh India tleirawlte thlen san ber ṭum chu 2013 kha a ni a, semifinal-ah Netherlands an hneh lo. Pathumna inchuhna inkhelah erawh England an ngam thung.

Kuminah beiseina an nei sang, an match hmasa palinah harsatna lian tham an tawk lo vek. Mahse, semifinal-ah erawh pumraw lian leh class sang Netherlands lakah chet an harsat a, semifinal lehlama chak lo zawk nen pathumna an zawm a ngai dawn.

Mizo an pawimawh
India tan Lalremsiami'n match zawng zawng a khel kim vek a, a bul ṭantu zingah a tel zel bawk. Marina-i'n group match-ah Malaysia a hmachhawn lo a, inkhel pawimawh chinah erawh South Korea leh Netherlands lakah bul a ṭan.

Lalrindiki'n match hmasa bera Wales an hneh ṭumin goal hnih a khung nghal a, Malaysia laka a khung nia lang erawh Mumtaz khung anga record a ni. Didiki hian Korea lakah sawi buai theih loh goal a khung chhunzawm ta tho a ni.

Wales leh Germany lakah Siami'n goal a khung a, midfield-ah khel mah se goal hmaah a hlauhawm reng. Kawnpui nula Marina pawh Dutch lakah chak lo mah se defender rinrawl a ni phak a, tunah an tum hlawhtling ngal lo mah se hmabak eng tak an la nei.

Dutch an ṭha
Netherlands hi world number 1 ni lai an ni a, ranking lamah an chunga leng an awm lo. Inelna neih laiah pawh goal khung thei ber an ni, an hma a ding apiang an sawp hrep zel a ni ber, an goal a him ṭha bawk.

United States (9-0), Canada (11-0) leh Zimbawe (18-0) a sawp chungin quarterfinal an lut a, semifinal thleng tur hian inelna thlengtu South Africa chu 5-0 in an sawp bawk, kawng tinrengin an chungnung a ni ber mai.

Junior World Cup-ah hian 1997, 2009 leh 2013 te khan an champion a, team hlawhtling ber an ni. Inelna neih hnuhnung pahnihah pawh final an lut a, mahse Argentina an ngam lo. Kuminah chuan champion tura rinkai ber an ni.

India Results
Group Match
India 5 - 1 Wales
IND: Lalremsiami Hmar 4'; Lalrindiki 32', 57'; Mumtaz Khan 41'; Deepika 58'
India 2 - 1 Germany
IND: Lalremsiami 2'; Mumtaz Khan 25'
Malaysia 0 - 4 India
IND: Mumtaz Khan 10', 26', 59'; Sangita Kumari 11'
Quarterfinal
India 3 - 0 South Korea
IND: Mumtaz Khan 11'; Lalrindiki 15'; Sangita Kumari 41'
Semifinal - April 10, Pathianni
Netherlands 3 - 0 India
NED: Beetsma Tessa 12'; Fokke Luna 53'; Dickle Jip 54'