City 2-2 Liverpool - Champion tur a la chiang lo
Etihad Stadium-ah minute 90 a ni a, referee-in inkhel a tawp tih lantir nan hamrik a ham a, City fan-ten kut an beng a, Liverpool fan-ten kut an beng bawk.
Khawvela coach ṭha ber anga tam takin an ngaih pahnih Pep Guardiola leh Jurgen Klopp te pawh hlim takin an inchibai a, team pahnih hi an result-ah an lungawi ve ve tih a lang.
Pathianni zan khan Premier League 'final' ang hiala tam takin an ngaihah City chuan Liverpool an mikhual a, 2-2 in an inhnehtawk - team pahnih inthlauhna point khat a la ni zel a, match sarih ve ve khelh tur an la nei bawk - Premier League a la hmuhnawm dawn chauh.
City-in Kevin de Bruyne leh Gabriel Jesus hmangin vawi hnih ngawt hma an hruai a, mahse, Diogo Jota leh Sadio Mane hmangin Liverpool-in an chhanglet ve ve. Premier League champion tur a la chiang lo.
City an chungnung
Etihad Stadium-ah City an chungnung zawk a, goal hmu tur pawhin nghah rei a ngai lo - minute ngana lekah player thiam bik Kevin de Bruyne-a'n goal a khung nghal.
City fans thawm a ṭha a, English football mai ni lo, European football-a team ṭha ber anga ngaih pahnih inkhel an ni a, goal khung hmasa zawk tan chance a ṭha tih a lang.
Mahse, Liverpool-in team danglam an ni tih an pholang - goal an chhuah aṭanga minute riatnaah an chance hmasa ber an hmu a, Trent Alexander-Arnold-a siamsak chu Jota chuan tun season-a a league goal 15-na turin a khung.
Goal an khung hnuah pawh Liverpool an insiamṭha chuang lo - City-in Reds ṭantute lung phu an tirang fo a, Joao Cancelo cross aṭanga ball kal chu Gabriel Jesus chuan minute 37-naah goal-ah a chantir a, 2-1 a ni.
Mahse...
City fan-te 2-1 a hma an hruai avanga an thla a muang a nih chuan Jurgen Klopp-a hnuaia Liverpool an hrechiang tawk lo tihna a ni - German coach-in chawlhlawk a hmang ṭha tih second half-ah a lang.
Khelmual an luh aṭanga minute khatna lekah Mane a lo lang a, Mohamed Salah siamsak ṭha zet chu a kum 30 tlin lawm nan goal-ah a chantir a, Etihad-ah Liverpool ṭantute an sapatal.
Inkhel a hmuhnawm tawlh tawlh a, goal dang erawh kan hmu tawh lo. Raheem Sterling-a'n chakna goal a khungah inngai mah se VAR hmanga ennawn a nih hnuah offside vangin pawmsak a ni lo.
Salah-a'n uiawm takin chance duhawm a hlah a, Riyad Mahrez-a'n goal a khung ngam lo emaw tih mai tur a ni - freekick aṭangin post a pet per a, hun tawp lama a chance neih duhawm chu holam takin a hlah bawk.
A la tawp lo
City-in treble champion nih an tum - league-ah chauh Liverpool nen an inel lo a, FA Cup semifinal-ah an la intawng leh dawn a, Champions League-ah an la dam ve ve bawk.
Pep chuan, "Dik taka sawi chuan, ka ning takzet a ni," tiin Liverpool an lo awm ve zel chu a nin thu a sawi - Nilaini zanah CL quarterfinal second leg khel turin Atletico Madrid an lenchilh ang a, April 16 zanah FA final luh inchuhin Reds nen an intawng leh ang.
League Cup champion Liverpool-in quadruple champion nih an tum a, a kawng erawh a la thui. Premier League-ah City chetsual chan tel a ngai tawh a, FA Cup-ah an hneh a ngai bawk.
Liverpool hi Nilaini zan dar 12:30-ah CL quarterfinal second leg khel turin an inlan dawn a, Anfield-ah 3-1 a an hneh hnu Benfica an mikhual dawn avangin chak tura ngaih an ni.
Boxing ang mai a ni. Ban dah thlak zuai hlana inhnek fuh leh ṭhin ang hi a ni ber a, kan ke pen a pai lo thei lo. Game ropui tak a ni a, result kan pawm thiam a ngai a, kan pawm thlap bawk. Game rorum tak a ni a, a boruak kha sang tak a ni. Team ṭha pahnih, in tihnat tum kan ni a, a tu zawk zawk pawh khan kan tawrh a ngai a ni. - Jurgen Klopp, Liverpool manager
Hmabak match sarih a awm tih kan hre ve ve a, hnehna kan chang vek a nih loh chuan kan champion dawn lo. Kan chak zawh loh avangin hun duhawm kan chana ngaihna ka nei a, kan chak tak loh avangin beiseina kan siamsak a ni. Mahse, eng nge thleng a pawimawh lo - inelna a la tawp lo. Chakin chak lo pawh ni ila, he thu tho hi ka sawi ang. Kan tih tur kan hria a, engnge thleng dawn erawh ka sawi thei lo. Klopp-a'n boxing nena a tehkhin pawh a awm viau e - innawr vel hi nuam a ti em asin! - Pep Guardiola, Manchester City manager