Thil mak mamawh Chelsea

Football-ah thil mak a thleng tawh fo ṭhin a, chu thil mak chu Chelsea mamawh a ni - Blues hian zanin dar 12:30-ah Champions League quarterfinal second leg khel turin Real Madrid an lenchilh dawn.

Champion lai Chelsea hian first leg-ah Real Madrid hi 3-1 in an ngam tawh lo a, Karim Benzema chuan hattrick a siam - Stamford Bridge-ah dawl zawrin an zawr.

Chelsea boss Thomas Tuchel chuan an hmaa hna inchhawp hautakzia a hria a, "Real lehthal tur chuan thawnthu ngaihnawm tak hi kan mamawh chu a ni mai," a ti a, an chak chuan football chanchin ngaihnawm zingah an tel a ring.

Champioon League-a away goal rule hman ni tawh lo chu Chelsea vanneihna a ni a, heti chung hian 2-0 tala an chak loh chuan an zinkawng a tawp dawn - inkhel pahnih belhkhawma goal khung hnem zawk an tlang ang.

Chona hautak
Tuchel chuan, "Bernabeu-a Real lehthal tum hi chona hautak ber zinga mi a ni hial ang - a bik takin si hnih fai tala chak ngai hian a ti harsa zual a, theih loh deuhthaw ang hialin a lang a ni. Mahse, theihtawp kan chhuah ang," a ti.

Blues hian Real an ngam loh hnuah, Inrinni zan khan Premier League-ah an thinrimna an hri thla a, Southampton chu khualmualah 6-0 ngawtin an sawp - goal khung an thiam tih a chiang.

Tuchel chuan, "Beiseina neih chu a thiang alawm - a chang chuan beiseina nei a, duh thu sam ve fo pawh a ṭha. Mahse, theihtawp kan chhuah a ngai tih erawh theihnghilh loh kan tum," a ti.

Chelsea tan Saints an hmachhawn ṭuma inlan thei lo captain Cesar Azpilicueta a inlan thei tawh dawn a, hliam vangin Romelu Lukaku a zin thei dawn lo a, Kai Havertz tan goal khung turin mawhphurhna a sang dawn.

Benzema a inpeih
Real Madrid-in an league match hnuhnung berah 2-0 in Getafe an hneh a, La Liga champion turin an dinhmun a ṭha takzet a, Champions League nomawi an duh tel bawk.

Getafe lakah coach Carlo Ancelotti-a'n Karim Benzema chu bul ṭantir mah se minute 74-naah a la chhuak a, Chelsea nen an inhmachhawn tur atan a khek tih a lang - Stamford Bridge-ah hattrick a siam tawh avangin London club a zuam ang.

Tun season-a goal 37 khung tawhtu Benzema bakah hian Toni Kroos leh Luka Modric pawh hahdamtir an ni a, Real midfielder ṭha pahnih phei hi chu khelmualah an lut lo hrim hrim.

Real tan kerek hliam zai Eden Hazard a inlan thei dawn lo a, a club hlui a lo mikhual thei dawn lo. Éder Militao chu hrem vangin a inlan thei dawn lo bawk a, Real-in player langsar chhawr theih loh tur dang an nei lo.

Bul ṭan tura beiseite
Real Madrid:
Courtois; Carvajal, Nacho, Alaba, Mendy; Modrić, Casemiro, Kroos; Valverde, Benzema, Vinícius Júnior

Chelsea:
Mendy; Chalobah, Thiago Silva, Rüdiger; James, Kanté, Kovačic, Alonso; Mount, Havertz, Ziyech

• Chelsea hi Premier League-ah pathumnaah an awm mek. League Cup-ah Blues hian final an lut a, Liverpool an hneh lo. FA Cup-ah semifinal an lut a, tunkar tawp hian Crystal Palace nen an inkhel ang. London club hi Champions League champion lai an ni a, nomawi pahnih chawi thei dinhmunah an ding.

• Real Madrid hi La Liga-ah hmahruaitu an ni a, champion turin an dinhmun a ṭha. Los Blancos hi Copa del Rey-ah quarterfinal-ah an tla a, chutihrualin Supercopa de España-ah nomawi an chawi. Carlo Ancelotti hote hian La Liga leh Champions League nomawi an beisei leh mek.