Hnehna nena bul ṭan RVL

Mapuia Memorial Mizoram Cricket League chu nimin aṭang khan khelh ṭan a ni a, tunlaia tualchhung cricket team ṭha bera chhal ngam Ramhlun Venglai chuan an match hmasa berah Kulikawn chu 21 runs-in an hneh.

Zing lam ruah sur vangin match hmasa hi a hunah ṭan theih a ni lo. Suaka Cricket Ground, Sihhmuiah RVL leh Kulikawn hian over 20 khel tur ni mah se over 15-ah tihhniam a ni a, vaw hmasatu Ramhlun Venglaiin 88 runs an siam.

RVL tan C. Vanlalhruaia'n 27 runs a siam a, Joseph Lalthankhuma leh Johan Lalbiakkima ten 17 runs ve ve an siam bawk. Joseph-a hian over thum a vawm aṭangin wicket hnih la bawkin Player of the Match atan thlan a ni.

Kulikawn lamin target umphak tum viau mah se mimal che ṭha an nei lo. Player malkhaia run 20 siam tling thei an awm lo a, over 14.5 chhungin 77 runs bak an tlin lo. President's Cup leh Mahuma Memorial champion lai RVL an chungnung.

Inkhel hnuhnung zawkah Chhinga Veng leh Luangmual an inkhel. Ruah surin a bumro avangin an khel zo thei lo, team pahnih hi inhnehtawka puan niin point an insem.

Vawiin hian a hmun ngaiah inkhel pahnih a awm leh dawn. Round 1 khar nan Chanmarians leh Bawngkawn South an inkhel ang, chawhnu lamah Kulikawn leh 3C ten round 2 an khel ṭan nghal dawn a ni.

Vawiin Inkhel Tur
Round 1
Chanmarians 09:00 AM Bawngkawn South
Round 2
Kulikawn 01:00 PM Chhinga Veng
April 13, Nilaini
Ramhlun Venglai 09:00 AM Chanmarians
Bawngkawn South 01:00 PM Luangmual

Nimin Inkhel Results
Ramhlun Venglai (98/8) bt Kulikawn (77/10)
Ramhlun Venglai hi run 21-in an chak
Toss: Kulikawn lamin bawm hmasak an thlang
PoM: Joseph Lalthankhuma
Chhinga Veng leh Luangmual an inhnehtawk, ruah a sur avangin khelh zawh theih a ni lo.