Villarreal lakah Bayern an tho chhuak thei ang em?

Champions League quarterfinal first leg-ah Bayern Munich-in Villarreal 1-0 in an hneh lo. Zanin dar 12:30 hian Allianz Arena-ah second leg khelh a ni dawn a, Yellow Submarine lakah Bayern thawhchhuah an tum ang.

Bayern leh Villarreal inkhela chak zawk hian semifinal-ah Liverpool leh Benfica inkhela chak zawk an hmachhawn dawn. Fixtures pawh zawhah Jurgen Klopp-a hote leh Bavarians te hi inhmachhawn tura ngaih an ni a, tunah erawh German club aiin Juventus pet chhuaktu Unai Emery hote dinhmun a ṭha zawk.

Villarreal hi
PSG leh Arsenal ten an hnawl tawh Unai Emery hi Spanish club tan chuan a hnathawh hi a ropui hle. Spanish manager hian Sevilla tan Europa League nomawi pathum a chawi a, Villarreal hi season liam ta khan Europa League-ah bawk a champion pui.

Champions League-ah pawh Emery hoten kawng dik an zawh chho mek. Villarreal hian quarterfinal thleng turin Italian club lian Juventus chu inkhel pahnih belhkhawmah 4-1 in an hneh a, 'Giant Killer' hming lem an pe der tawh.

First leg-ah Yellow Submarine-in Bavarians 1-0 in an hneh a, tactical battle-ah Unai Emery hi Julian Nagelsmann lakah a chungnung hle. Spanish club hian Robert Lewandowski an dah ṭha a, goal chance ṭhahnem tak an nei bawk.

Emery chuan, "Bayern hneh tur chuan second leg ṭha lehzuala kan khelh a ṭul a, kan zavaiin kan theihna zawng zawng kan chhuah a ṭul a ni," tiin a sawi. Spanish club hi kartawp khan Athletic Bilbao nen 1-1 in an inhnehtawk a, hriat tel tur erawh manager Emery-a'n bul ṭantute zingah Bayern an hneh ṭuma bul ṭantute a awltir vek. Yellow Submarine-in Champions League an ngai pawimawh tih a lang.

Bayern ṭha zawk?
Bayern Munich-in first leg-a an chak loh zawhah Augsburg an hmachhawn a, 1-0 chauhin an chak. Bavarians hian chak turin penalty an mamawh a, an game a ṭha tawk lo bawk.

Nagelsmann chuan, "Goal kan venghim ṭha lo a, kan goal bawh a na tawk lo. Chak kan phu lo," tiin first leg-a an chak loh zawhah a sawi a, semifinal lut turin insiamṭhat an mamawh hle.

Bayern tana chanchin lawmawm erawh an dam kim ṭha a, Allianz Arena-ah ṭan phat aṭangin an nawr dawn. Lewy hi minute 90 dang dah ṭhat a har dawn a, Polish striker thlawp tur hian Thomas Muller, Serge Gnabry leh Kingsley Coman te an awm. Villarreal dinhmun ṭha hret mah se Bavarians hi semifinal lut tura rinkai zawk an la ni tho.

Champions League Quarterfinal
First Leg
April 5, Thawhlehni Zan
Manchester City 1 - 0 Atletico Madrid
MAN: Kevin De Bruyne 70'
Benfica 1 - 3 Liverpool
BEN: Darwin Nunez 49'
LIV: Ibrahima Konate 17'; Sadio Mane 34'; Luis Diaz 87'
April 6, Nilaini Zan
Villarreal 1 - 0 Bayern Munich
VIL: Arnaut Danjuma 8'
Chelsea 1 - 3 Real Madrid
CHE: Kai Havertz 40'
REA: Karim Benzema 21', 24', 46'
Second Leg
Zanin Inkhel Tur
Bayern Munich 12:30 AM Villarreal
Real Madrid 12:30 AM Chelsea
April 13, Nilaini Zan
Atletico Madrid 12:30 AM Manchester City
Liverpool 12:30 AM Benfica