MPL Under 18 khel ṭan dawn

Mizoram Premier League Under 18 (2021-2022) chu vawiin aṭangin Lammualah khelh ṭan a ni dawn. Inelnaah hian MPL club pariat Under 18 team-te an inlan dawn a, vawi khat ṭheuh an inkhelh chhuah hnuah a sang paliin semifinal an khel ang.

MPL Under 18 hi April 8, Zirtawpni zan khan Vaivakawn YMA Hall-ah Mizoram Youth Commission chairman Dr. Vanlalṭanpuia'n a kick off tawh a, vawiinah inelna tak neih a ni dawn. MPL kum bithliah inelna neih hnuhnun ber ṭum hi kum 2019 daih tawh kha a ni a, Aizawl FC chu champion lai an ni.

Aizawl FC Under 18 hian final-ah Chhinga Veng an hmachhawn a, hun pangngaiah 2-2 a an inhnehtawk hnuin penalty shootout-ah AFC 3-2 in an chak. Tun ṭumah pawh hian Aizawl FC leh Chhinga Veng te hi champion tura rinkai zingah an tel pha ang.

Covid-19 vangin kum hnih chhung inelna leh training kalpui theih a ni lo a, tun ṭum inelnaah hian inbuatsaihna nei ṭha fal an awm dawn lo. Chutihrualin trial-naa player thlang thiam leh coach tawnhriat neite theihna a lang dawn a, inbuatsaihna nei ṭha bik awm lo mah se club ṭha deuh erawh an awm dawn.

Inelna hmachhawn turte hi Aizawl FC, Chanmari FC, Chhinga Veng FC, Electric Veng FC, FC Bethlehem, FC Chawnpui, FC Venghnuai leh Mizoram Police FC te an ni a, vawiinah an inlan vek dawn. Semifinal hi April 27, Nilaini-ah khelh a ni ang a, final hi April 30, Inrinniah khelh tura ruahman a ni.

Round 1 - Vawiin Inkhel Tur
Chanmari FC 9:00 AM Electric Veng FC
Mizoram Police 11:00 AM FC Venghnuai
Aizawl FC 1:00 PM FC Bethlehem
Chhinga Veng 3:00 PM FC Chawnpui