Barca-in penalty vawi thum hmu Levante an hneh
La Liga aṭanga tlak hlauhawm Levante-in Barcelona lakah penalty vawi thum hmu mah se vawi hnih chiah an khung thei a, a tawpah 3-2 in Barcelona an chak.
Barcelona tan Luuk de Jong chuan hun pek belh minute hnihnaah chakna goal a khung a, Catalan club-in Real la phak lo deuh mah se champion an la beisei chhunzawm ve zel.
Xavi nauten hnehna an chan avangin table-ah pahnihna an ni a, hmahruaitu Real Madrid chu point 12-in an phak lo mek - match khatin an khel tlem thung.
Barcelona hian league match 15 chhung chu tlawm an nei tawh lo a, hetih chhung hian vawi 11 chakin vawi li draw an nei - European top five league-a team form ber an ni mek.
Levante tan penalty
Barcelona-in Levante mualah awlsam takin hnehna an chang tura ngaih a ni a, mahse, kan beisei loh thawnthu zawk kan hmu - first half chhungin goal a lut lo.
Second half-ah Levante zawkin goal khungna chance duhawm an nei nghal. Levante defender Son lakah Dani Alves a foul a, mualneitu lamin penalty an hmu.
Levante tan hian Jose Luis Morales chuan minute 52-naah penalty hi goal-ah a chantir a, minute li chauh a liam hman tihin Barca centre back Eric Garcia chu a handball zui!
Mualneituin penalty an hmu leh a, mahse, Levante striker Roger-a shot chu Barca keeper Marc-Andre ter Stegen chuan a dansak a, Barca an harh zawk.
A hmuhnawm
Penalty an dan aṭanga minute thumna lekah Barca hun a inher chhuak a, Ousmane Dembele-a ball cross ṭha tak chu Pierre-Emerick Aubameyang chuan goal-ah a chantir - Arsenal fan-ten lungleng takin an thlir ang.
A la tawp lo - minute 63-naah bench aṭanga luhtir pahnih an inlar a, Barca rawlthar duhawm Gavi chuan amah ang bawka hmabak nei êng Pedri tan a siamsak a, Spain international hian goal-a chantir turin harsatna a nei lo.
Mahse, Barca vanduai a kaltluang. Levante forward Maxi Gomez lakah Clement Lenglet a foul a, a vawi thum nan Barca-in penalty an chawi - Gonzalo Melero chuan goal-ah a chantir.
Real Madrid academy aṭanga inzir chhuak Melero-a'n goal a khung hian minute 83-na a ni tawh a, La Liga table-a 19-na team hian Barca lakah point an hlawh dawn niin a lang.
A hming De Jong
Minute 90 a ni tawh a, 2-2 a la ni mek. Barca fans an mangang a, point khata lungawi tumin an ngaihtuahna an seng hman - mahse, football mawina a lo lang a, a tawpah Barca an vul.
Xavi-a'n minute 84-naah Aubame-yang la chhuakin a aiah striker De Jong a luhtir a, thutlukna a siam sual lo. Dutch striker hian Jordi Alba-a cross chu hun pek belh minute thumnaah a tauh lut!
Levante tan chhanletna hun a awm tawh lo a, a hunah tak De Jong a rah - Sevilla aṭanga loan-a an hawh striker hian inelna hrang hrangah match 23 khelin goal sarih a khung tawh.
Barcelona an vannei a, chak lo thei dinhmun aṭangin hun pek belhah an tho chhuak - Levante-in inkhel an thlirkir ang a, an penalty hlah te, Morales-a'n ṭha taka ball a lakluh hnua Ter Stegen leh Garcia ten goal line aṭanga an lo dan hmante kha an ui khawp ang.