Inkhelh theih loh kha tha khekna a ni - Djokovic

Novak Djokovic chuan season tir lama a inkhel thei lo chu hrehawm a ti a, hripui laka invenna lak loh vanga a inkhelh theih loh avangin a taksa a hahchawl ni maia a ngaih thu a sawi bawk.

Tunkar chhunga khelh tur Monte Carlo Open-ah chuan Djokovic hi a inlan thei dawn, zanin hian a match hmasa berah Alejandro Davidovich Fokina a hmachhawn ang.

Serbian star Djokovic chuan, "Hringnunah hian hun harsa ka lo hmachhawn fo tawh, a eng lam zela thil thlir mi ka ni. Tun season tir lama ka inkhelh theih loh pawh hi a ṭha zawnga ngaihtuah mai kha a finthlak.

"Hahchawlhna hun ka neiah ka ngai mai a, chawlhna hun ka hman chhunga ka thahrui khawl khawm hi season chawhnu lamah a la ṭangkai ang," tiin thahrui tam zawk nen a lo kir tur thu a sawi.

Vaccine a lak loh avangin Djokovic hian Australian Open a khel thei lo a, inelna hmachhawn turin United States lamah a zin lut thei lo bawk. Spain leh France-ah erawh harsatna nei loin a inkhel thei dawn niin a lang.