Ashwin a ‘retired out’

Indian Premier League history-ah Ravichandran Ashwin chu batter zinga team ṭhatna tura 'retired out' hmasa ber a ni.

Pathianni zan khan Rajasthan Royals-in Lucknow Super Giants chu run thumin an hneh a, inkhelh hmuhnawmah hian Ashwin-a thutlukna hian sawizui a hlawh.

Lucknow-in vawm hmasak an thlang a, Rajasthan-in an bat hmasa a, over 18.2-ah 135/5 runs siamin Shimron Hetmyer leh Ashwin ten an bat mek.

Ashwin hian a dawta awm Riyan Parag-a'n a bat theih nan pavillion a pan. West Indies cricketer hlui Ian Raphael Bishop chuan, "T20 tactic mi la tak a ni. T20 hian cricket khelh danah ngaihtuahna thar min hmantir a ni," tiin a sawi.

Hetmeyer pawhin inkhelh banah a hriat lawk loh thu a sawi a, Ashwin thutlukna a fak tel bawk. Rajasthan hian a tawp ball 10-ah 30 runs dang an siam a, over 20-ah 165/6 runs an siam.

Lucknow captain KL Rahul leh Krishnappa Gowtham ten run siam lo mah se Quiton de Kock (39), Deepak Hooda (25), Krunal Pandya (22) leh Marcus Stoinis (38*) te hmangin over tawp thlengin chak beiseina an nei.

Over tawp berah hian 15 runs siam a la ngai a, Lucknow hian 11 runs siam belhin 162/8 runs siam tling mah se Rajasthan Royals hi 3 runs-in an pha lo.

Inkhel dangah Delhi Capitals (215/5) in Kolkata Knight Riders (171) chu 44 runs-in an hneh. Zanin dar 7:30 hian Chennai Super Kings leh Royal Challengers Bangalore te an inkhel ang.