Mohammedan an chak lo

Pathianni zan I League inkhelah RoundGlass Punjab-in Mohammedan SC 3-1 in an hneh a, Kolkata club hi pahnihnaah tla thlain Gokulam Kerala chu hmahruaitu thar an ni. Inkhel dangah Rajasthan FC leh Real Kashmir te 2-2 in an inhnehtawk a, Aizawl FC tan championship stage khelh theihna kawng a la inhawng.

Inrinni zanah Gokulam Kerala-in Indian Arrows 5-0 in an sawp a, league hmahruaitu ni mah se Mohammedan aiin match khatin an khel tam. Kolkata club tan hmahruaitu ni chhunzawm turin Pathianni zanah RoundGlass Punjab an hneh a ṭul. Naihati Stadium-ah Kolkata club-in beiseina sang tak nei mah se English forward Kurtis Guthrie an ngam lo.

Guthrie hi League Two club Bradford City, Port Vale, Colchester United leh Stevenage tan a khel tawh a, kum 28 mi chauh a nih bawk avangin I League atan chuan a la ṭha tawk hle. Minute 10-na lekah Guthrie hian goal hmahruai a khung a, minute 32-naah Mohammedan-in Stojanovic hmangin sut mah se Guthrie bawkin minute 36-naah hmahruaina goal a khung.

Mohammedan goal khung khawl Marcus Joseph chu Punjab club-in an dang chat a, minute 82-naah substitute Rupert Nongrum-a'n khung belhin RoundGlass Punjab-in 3-1 in hnehna an chang. Punjab tan hian Mizo tlangval Freddy Lallawmawma'n a khel tluan a, Mohammedan tan Zothanmawia, Lalramchullova leh Brandon VL Remdika ten bul an ṭan bawk.