Goal khung thei lo AC Milan

Serie A hmahruaitu nih fal theihna remchang an nei a, mahse AC Milan chuan an hun ṭha an chhawr ṭangkai thei lo. Stefano Pioli naute hi Torino nen goal khung loin an inhnehtawk, a chung berah la awm mah se an dinhmun a him lo.

Inrinni zanah Inter Milan an chak a, hmahruaitu Milan an hnaih sawt. Champion lai Nerazzurri hian khelh hmabak pakhat an neihah hnehna an chang a nih chuan Milan nek chhuakin hmahruaitu an ni ang.

Goal khung harsat
AC Milan hian kuminah goal khung an harsat, an match hnuhnung pasarihah goal li chiah an khung. Tun hnai match hnihah phei chuan goal an khung miah lo, tlarhma an bil tlat chuan champion a harsa dawn.

Arsenal leh Chelsea striker hlui Olivier Giroud-a'n minute 90 chhungin goal a sual chhuak zo lo, remchang chu nei ve bawk mah se a vannei tawk lo, a hmela goal khung duhna lo lang chu a takin a chantir thei lo a ni.

Milan hian tlarhmaah senior player pahnih an nei. Giroud hi kum 35 mi a ni tawh a, kum 40 mi Zlatan Ibrahimovic inlan thei pawh ni se danglam a siam bik lo mai thei, season chawhnu lamah player uaithla lam tawhin goal khung an harsat.

Chiang a awm lo
AC Milan manager Stefano Pioli chuan Scudetto chawi thei an la tam thu a sawi a, match khelh hmabak an la ngah avangin engmah sawi chian theih a la nih loh thu a sawi lang tel bawk.

Pioli chuan, "Goal khung tumin kan theihna zawng zawng kan hmang a, kawng hrang hrang pawh kan dap. Mahse, Torino kha an inveng thiamin paltlang an harsa, a hmawr kan bawk thei lo erawh keimahni mawh a nih thung.

"Tun hnai chawlkar thum chhung vel hian league dinhmun a inthlak thut thut a, tunah pawh inthlak thei reng a la ni," a ti. Milan hian season 10 chhung league nomawi an ban phak ta lo, kuminah erawh beisei an la nei.

Juve an chak
Champion beisei ngam tawh chiah lo mah se Juventus an la inthlahdah duh bik lo. Old Lady hian Cagliari lakah si an phur hmasa leh a, defender Matthijs de Ligt hmanga an sut hnuah Dusan Vlahovic chuan chakna goal a khung a, 2-1 in hnehna an chang.

Juve manager Massimiliano Allegri chuan, "Cagliari hian theihna sang tak an nei, chuvangin an khelmualah phei chuan hneh harsa tak an ni. Point thum hlu tak kan hlawh chhuak thei, hei hi palina nih theih nan a pawimawh," a ti.

Serie A match 32 aṭangin Juve hian point 62 an hmu a, palina an ni mek. Pangana AS Roma hi Jose Mourinho enkawl niin an inkarah point nga a la awm, season thara Champions League khelh tum tan inthlahdah a remchang lo.